- Къартны бурнун сюрт да, оноугъа тут.
- Бастасын ашагъан, хантусун да ичер.
- Къонагъы джокъну – шоху джокъ.
- Телиге от эт десенг, юйюнге от салыр.
- Юй ишлеген балта эшикде къалыр.
- Ёлюр джаннга, ёкюл джокъ.
- Ауругъанны сау билмез, ач къарынны токъ билмез.
- Кийимни бичсенг, кенг бич, тар этген къыйын тюлдю.
- Ата джурт – алтын бешик.
- Тюзлюк шохлукъну бегитир.
- Адам туугъан джеринде, ит тойгъан джеринде.
- Этим кетсе да, сюегим къалыр.
- Тойгъа барсанг, тоюб бар, эски тонунгу къоюб бар.
- Аякъларынгы джууургъанынга кёре узат.
- Харам къарнашдан, халал тенг ашхы.
- Билим къая тешер.
- Биреуню тёрюнден, кесинги эшик артынг игиди.
- Босагъагъа джууукъ орун болса, ашыгъыб тёрге озма.
- Кесине гебен этелмеген, биреуге черен эте эди.
- Билими азны – ауузунда кирит.
- Адамны сабийин сюйген джюреги, бычакъча, джитиди.
- Ат басханны джер билед.
- Ётюрюкден тюбю джокъ, кёлтюрюрге джиби джокъ.
- Келинни – келгинчи, бёркню кийгинчи кёр.
- Таула не мийик болсала да, аууш табылыр.
- Тёрени джагъы джокъ.
- Къууут – джелге, берне – бошха.
- Эрни эр этерик да, къара джер этерик да, тиширыуду.
- Джаз бир кюнню джатсанг, къыш талай кюнню абынырса.
- Аз айтсам, кёб ангылагъыз.
- Сёлеш деб шай берген, тохта деб, сом берген.
- Ариу сёзде ауруу джокъ.
- Ётюрюкчюню шагъаты – къатында.
- Акъдан къара болмаз.
- Минг тенг да азды, бир джау да кёбдю.
- Къайгъы тюбю – тенгиз.
- Хатерли къул болур.
- Айранны сюйген, ийнек тутар.
- Ёлген аслан – сау чычхан.
- Джеринден айырылгъан – джети джылар, джуртундан айырылгъан – ёлгюнчю джылар.
- Аман адам элни бир-бирине джау этер.
- Эл ауузу – элек, анга ийнаннган – халек.
- Алтыннга тот къонмаз.
- Къарнынг къанлынга кийирир.
- Биреу къой излей, биреу той излей.
- Ата Джуртуму башы болмасам да, босагъасында ташы болайым.
- Сибиртки да сыйлы болду, кюрек да кюнлю болду.
- Аш хазыр болса, иш харам болур.
- Эшекге миннген – биринчи айыб, андан джыгъылгъан – экинчи айыб.
- Азыкъ аз болса, эртде орун сал.
Профиль
|
||||