- Сакъ юйюне сау барыр.
- Джолунга кёре – джюрюшюнг, джагъанга кёре – юлюшюнг.
- Джахил болса анасы, не билликди баласы?
- Керти сёзге тёре джокъ.
- Босагъагъа джууукъ орун болса, ашыгъыб тёрге озма.
- Билген билмегенни юретген адетди.
- Джумушакъ терекни къурт ашар.
- Ишленмеклик адамлыкъды.
- Ойнай-ойнай кёз чыгъар.
- Адамны аманы адамны бети бла ойнар.
- Малны кют, джерни тюрт.
- Джашны джигитлиги сорулур, къызны джигерлиги сорулур.
- Агъач халкъгъа алтынды, иссиликге салкъынды.
- Чакъырылмагъан джерге барма, чакъырылгъан джерден къалма.
- Минг тенг да азды, бир джау да кёбдю.
- Ач, тоймам, дейди, тойгъан, ач болмам, дейди.
- Джогъун бар этген, барын бал этген.
- Бал ашаргъа сюе эсенг, чибин ургъаннга тёз.
- Алим болгъандан эсе, адам болгъан къыйынды.
- Аш иеси бла татлыды.
- Бети – къучакълар, джюреги – бычакълар.
- Билимли ёлмез, билимсиз кёрмез.
- Тешик этген тынчды, аны джамагъан къыйынды.
- Ашхы атаны – джашы ашхы, ашхы ананы – къызы ашхы.
- Итли къонакъ джарашмаз.
- Аякъларынгы джууургъанынга кёре узат.
- Джети тилни билген джети кишиди.
- Адамны аты башхача, акъылы да башхады.
- Къолу уллу – асыу, аягъы уллу – джарсыу.
- Акъылсызны джууукъгъа алма, акъыллыны кенгнге салма.
- Рысхы – насыбха къор.
- Эки къатын алгъанны къулагъы тынгнгаймаз.
- Рысхы джалгъанды: келген да этер, кетген да этер.
- Нарт сёз – тилни бети.
- Ауругъан – джашаудан умутчу.
- Кёбден умут этиб, аздан къуру къалма.
- Кёбню кёрген – кёб билир.
- Ишге юренсин къоллары, халкъ бла болсун джоллары.
- Къарт болгъан джерде, берекет болур, сабий болгъан джерде, оюн болур.
- Нафысынгы айтханын этме, намысынгы айтханын эт.
- Баш – акъыл ючюн, акъылман – халкъ ючюн.
- Къатын байлыкъны сюер, эр саулукъну сюер.
- Ёзденликни кёбю ётюрюк.
- Джукъу тёшек сайламайды.
- Уллу атлама – абынырса, уллу къабма – къарылырса.
- Ачлыкъ отха секиртир.
- Ёксюзню тилеги къабыл болур.
- Иги болса, тамадама – махтау, аман болса, меннге – айыб.
- Къалгъан ишге къар джауар.
- Аджашхан тёгерек айланыр.
Профиль
|
|
|||