- Рысхысына кёре, джаш ёсер, къышлыгъына кёре, мал ёсер.
- Итли къонакъ джарашмаз.
- Ауругъаннга – кийик саулукъ, джетген къызгъа – чилле джаулукъ.
- Аш хазыр болса, иш харам болур.
- Алма терегинден кери кетмез.
- Зарда марда джокъ.
- Кютгени беш эчки, сызгъыргъаны уа, джерни джарады.
- Кёл ашады да, кеси ашады.
- Юре билмеген ит, къонакъ келтирир.
- Айтылгъан сёз ызына къайтмаз.
- Сагъыш – къартлыкъгъа сюйюмчю.
- Чомарт джарлы болмаз.
- Биреуге аманлыкъ этиб, кесинге игилик табмазса.
- Ач бёрюге мекям джокъ.
- Ана кёлю – балада, бала кёлю – талада.
- Байма, деб да, къууанма, джарлыма, деб да, джылама.
- Миллетни бойну – базыкъ, аны бла кюрешген – джазыкъ.
- Айтханы чапыракъдан ётмеген.
- Бети – къучакълар, джюреги – бычакълар.
- Билим ат болуб да чабар, къуш болуб да учар.
- Тешик этген тынчды, аны джамагъан къыйынды.
- Тилсиз миллет джокъ болур.
- Джангызны оту джарыкъ джанмаз!
- Джыланны къуйругъундан басарынг келсе, аны башы болгъанын унутма.
- Айныгъанлы алты кюн, тогъайгъанлы тогъуз кюн.
- Артына баргъанны, къатына барма.
- Бичгенде ашыкъма, тикгенде ашыкъ.
- Онгсузну – джакъла, тенгликни – сакъла.
- Къралынгы – душмандан, башынгы от бла суудан сакъла.
- Арба аугъандан сора, джол кёргюзтюучю кёб болур.
- Къарнынг къанлынга кийирир.
- Ашха уста, юйюнде болсун
- Джырына кёре эжиую.
- Эм уллу байлыкъ – джан саулукъ.
- Тынгылагъан тынгы бузар.
- Чакъырылмагъан джерге барма, чакъырылгъан джерден къалма.
- Кесине гебен этелмеген, биреуге черен эте эди.
- Эртде тургъан джылкъычыны эркек аты тай табар.
- Татлы сёз – балдан татлы.
- Хата – гитчеден.
- Тойгъан джерге джети къайт.
- Таш бла ургъанны, аш бла ур.
- Ат басханны джер билед.
- Ышармагъан – кюлмез, кюлмеген – къууанчны билмез.
- Тамчы таш тешер.
- Тюз сёз баргъан сууну тыяр.
- Эл ауузу – элия.
- Иги джашны ышаны – аз сёлешиб, кёб тынгылар.
- Сескекли кесин билдирир.
- Адамны джюреги нени кёрюрге сюйсе, кёзю да аны кёрюрге ёч болады.
Профиль
|
|
|
|||