- Эл ауузу – элия.
- Джигер – джаннга къыйынлыкъ.
- Кесинг сынамагъан затны, адамгъа буюрма.
- Къуру гыбыт бек дыгъырдар.
- Ач бёрюге мекям джокъ.
- Чабар ат – джетген къыз.
- Аш хазыр болса, иш харам болур.
- Биреуню эскиси биреуге джангы болмайды.
- Джюрекге ариу – кёзге да ариу.
- Ётген ёмюр – акъгъан суу.
- Эшекге миннген – биринчи айыб, андан джыгъылгъан – экинчи айыб.
- Ойнай-ойнай кёз чыгъар.
- Магъанасыз сёз – тауушсуз сыбызгъы.
- Гитче джилтин уллу элни джандырыр.
- Аурууну келиую тынч, кетиую – къыйын.
- Аман адам элни бир-бирине джау этер.
- Джеринден айырылгъан – джети джылар, джуртундан айырылгъан – ёлгюнчю джылар.
- Ёлген аслан – сау чычхан.
- Ана къолу ачытмаз.
- Ёгюзню мюйюзлери ауурлукъ этмейдиле.
- «Ёгюз, джаргъа джууукъ барма, меннге джюк боллукъса», - дегенди эшек.
- Аджаллыгъа окъсуз шкок атылыр.
- Олтуруб кёрюнмей эди да, ёрге туруб кёрюне эди.
- Бастасын ашагъан, хантусун да ичер.
- Чалманны аллы къалай башланса, арты да алай барады.
- Бозаны арты дауур болур.
- Билмезни кёзю кёрмез, этмезни къулагъы эшитмез.
- Джахил болса анасы, не билликди баласы?
- Къонакъны къачан кетерин сорма, къачан келлигин сор.
- Ёнгкюч къууана барыр, джылай келир.
- Махтаннган къыз, тойда джукълар.
- Къолу уллу – асыу, аягъы уллу – джарсыу.
- Кёзю сокъурдан – къоркъма, кёлю сокъурдан – къоркъ.
- Башы джабылгъан челекге, кир тюшмез.
- Кюн – узун, ёмюр – къысха.
- Ёгюзню мюйюзюнден тутадыла, адамны сёзюнден тутадыла.
- Уллу сёлешме да, уллу къаб.
- Ётюрюкню башын керти кесер.
- Айранны сюйген, ийнек тутар.
- Асхат ашлыкъ сата, юйдегиси ачдан къата.
- Ётюрюкден тюбю джокъ, кёлтюрюрге джиби джокъ.
- Бир абыннган – минг сюрюнюр.
- Мал кёб болса, джууукъ кёб болур.
- Мал ёлсе, сюек къалыр, адам ёлсе, иши къалыр.
- Сууда джау джокъ, кёб сёзде магъана джокъ.
- Накъырданы арты керти болур.
- Эм ашхы къайын ана мамукъ бла башынгы тешер.
- Оюмсуз атлагъан, аджалсыз ёлюр.
- Эртде тургъан джылкъычыны эркек аты тай табар.
- Ана кёлю – балада, бала кёлю – талада.
Профиль
|
|
|||