- Джумушакъ терекни къурт ашар.
- Эри аманны, къатыны – аман.
- Элиб деген, элге болушур.
- Ишлемеген – тишлемез.
- Айран тёгюлсе, джугъусу къалыр.
- Къазанда болса, чолпугъа чыгъар.
- Окъ къызбайны джокълайды.
- Бетинги сатма, малынгы сат.
- Къууут – джелге, берне – бошха.
- Бал ашаргъа сюе эсенг, чибин ургъаннга тёз.
- Туз, гырджын аша, тюзлюк бла джаша.
- Акъылсызны джууукъгъа алма, акъыллыны кенгнге салма.
- Джыгъылгъанны сырты джерден тоймаз.
- Артына баргъанны, къатына барма.
- Тойгъан джерден туугъан джер игиди.
- Тойгъан антын унутур.
- Эски джаугъа ышанма.
- Окъугъанны бети джарыкъ.
- Ат басханны джер билед.
- Билим къая тешер.
- Элни кючю – эмеген.
- Ачыу алгъа келсе, акъыл артха къалады.
- Ашлыкъны арба юйге келтирир, чана базаргъа элтир.
- Ашхы тенг джолгъа салыр, аман тенг джолдан тайдырыр.
- Сакъалы текени да бар, мыйыгъы киштикни да бар.
- Аякъларынгы джууургъанынга кёре узат.
- Насыблы элин сюер, насыбсыз кесин сюер.
- Урама да – ёледи, сатама да – келеди.
- Ач къарным, тынч къулагъым.
- Халкъны джырын джырласанг, халкъ санга эжиу этер.
- Ашыкъгъан cуу, тенгизге джетмез.
- Сёз садакъдан кючлюдю.
- Тамбла алтындан бюгюн багъыр ашхы.
- Сёз къанатсыз учар.
- Джумушакъ сёз къаты таякъны сындырыр.
- Элге къуллукъ этмеген, элге ие болмаз.
- Хантына кёре тузу, юйюне кёре къызы.
- Къартны бурнун сюрт да, оноугъа тут.
- Мураты болгъанны джюрек тебюую башхады.
- Зарда марда джокъ.
- Ата Джуртуму башы болмасам да, босагъасында ташы болайым.
- Игиге айтсанг – билир, аманнга айтсанг – кюлюр.
- Адамны джюреги нени кёрюрге сюйсе, кёзю да аны кёрюрге ёч болады.
- Тик ёргени, тик энгишгеси да болады.
- Уллу къазанда бишген эт, чий къалмаз.
- Джахил болса анасы, не билликди баласы?
- Тойгъа алгъа да барма, тойда артха да къалма.
- Нёгерсизни джолу узун.
- Ёзденликни джайгъан – джокълукъ.
- Сёз – кюмюш, джыр – алтын.
Профиль
|
|
|||