- Суугъа – чабакъ, къаягъа – ыргъакъ.
- Ата Джуртча джер болмаз, туугъан элча эл болмаз.
- Къайгъы тюбю – тенгиз.
- Чакъырылмагъан къонакъ – орунсуз.
- Тюзню ётмеги тюзде къалса да, тас болмаз.
- Тенги кёбню джау алмаз, акъылы кёбню дау алмаз.
- Айныгъанлы алты кюн, тогъайгъанлы тогъуз кюн.
- Тели турса – той бузар.
- Кёбге таш атма.
- Биреуню къыйынлыгъы бла кесинге джол ишлеме.
- Нёгерсизни джолу узун.
- Къызгъанчдан ычхыныр, мухардан ычхынмаз.
- Эринчекге кюн узун.
- Кёбден умут этиб, аздан къуру къалма.
- Иги сеники эсе да, сюйген кесимикин этеме.
- Эки ойлашыб, бир сёлешген.
- Игилик игилик бла сингдирилиучю затды.
- Ойнаб айтсанг да, эслеб айт.
- Нафысынгы айтханын этме, намысынгы айтханын эт.
- Адеб базарда сатылмаз.
- Ата Джуртун танымагъан, атасын да танымаз.
- Юй ишлеген балта эшикде къалыр.
- Башы ишлегенни, ауузу да ишлер.
- Олтуруб кёрюнмей эди да, ёрге туруб кёрюне эди.
- Къатын байлыкъны сюер, эр саулукъну сюер.
- Тамбла алтындан бюгюн багъыр ашхы.
- Джаш къарыу бла кючлю, къарт акъыл бла кючлю.
- Дуния аламаты сен эсенг да, игиме деб айтма.
- Болджал ишни бёрю ашар.
- Кёбню кёрген – кёб билир.
- Ата Джуртуму башы болмасам да, босагъасында ташы болайым.
- Баланы адам этген анады.
- Эл тойса, тоймагъан, эл къойса, къоймагъан.
- Ётюрюкден тюбю джокъ, кёлтюрюрге джиби джокъ.
- Соргъан айыб тюлдю, билмеген айыбды.
- Шапа кёб болса, аш татымсыз болур.
- Акъыллы – эл иеси, тели – эл баласы.
- Ариу – кёзге, акъыл – джюрекге.
- Байма, деб да, къууанма, джарлыма, деб да, джылама.
- Мадар болса, къадар болур.
- Ана кёлю – балада, бала кёлю – талада.
- Чомартха Тейри да борчлуду.
- Термилгенинги табмазса, кюлгенинге тюберсе.
- Сабийликде юретмесенг, уллу болса – тюзелмез.
- Къарнынг тойгъунчу аша да, белинг талгъынчы ишле.
- Ана – юйню кюн джарыгъы.
- Джаханимни кёрмей, джандетге кёл салмазса.
- Хунаны тюбюн къазсанг, юсюнге ауар.
- Къралынгы – душмандан, башынгы от бла суудан сакъла.
- Бети къызарыучу адамны, джюреги харам болмаз.
Профиль
|
|
|||