- Тас болгъан бычакъны сабы – алтын.
- Керек ташны ауурлугъу джокъ.
- Ач, тоймам, дейди, тойгъан, ач болмам, дейди.
- Бастасын ашагъан, хантусун да ичер.
- Акъыл аздырмаз, билим тоздурмаз.
- Накъырда – кертини келечиси.
- Танг атмайма десе да, кюн къоярыкъ тюйюлдю.
- Аман адам элни бир-бирине джау этер.
- Байдан умут эте, джарлыдан ёгюз багъасы къорады.
- Эркишини аманы тиширыуну джылатыр.
- Кёбден умут этиб, аздан къуру къалма.
- Эрни эр этерик да, къара джер этерик да, тиширыуду.
- Къар – келтирди, суу – элтди.
- Аякъларынгы джууургъанынга кёре узат.
- Ётген ёмюр – акъгъан суу.
- Кесинг сынамагъан затны, адамгъа буюрма.
- Къонакъ аман болса, къонакъбай джунчур
- Сангырау къулакъ эл бузар.
- Байны оноуу, джарлыгъа джарамаз.
- Шайтан алдады, тюзлюк къаргъады.
- Айныгъанлы алты кюн, тогъайгъанлы тогъуз кюн.
- Эки элинги тыйсанг, джети элде махталырса.
- Эртде тургъан бла эртде юйленнген сокъуранмаз.
- Джолда аягъынга сакъ бол, ушакъда тилинге сакъ бол.
- Хар зат кесини орнуна иги.
- Джауумдан сора, кюн кюйдюрюр, ётюрюкден сора, айыб кюйдюрюр.
- Ариу – кёзге, акъыл – джюрекге.
- От кюйдюрген, сау болса да, тот кюйдюрген, сау болмаз.
- Керилген да, ургъан кибикди.
- Айранны сюйген, ийнек тутар.
- Джаралыны джастыгъында сау ёлюр.
- Бойнуму джети джерден кессенг да, мен ол ишни этеллик тюлме.
- Юйлю уругъа ит чабмаз.
- Экеулен сёлеше тура эселе, орталарына барыб кирме.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Акъылсызны джууукъгъа алма, акъыллыны кенгнге салма.
- Тёрени джагъы джокъ.
- Бетинги сатма, малынгы сат.
- Юй ишлеген балта эшикде къалыр.
- Ёпкелегенни ашы татлы болады.
- Хантына кёре тузу, юйюне кёре къызы.
- Тил бла келеди джыр да.
- «Ёгюз, джаргъа джууукъ барма, меннге джюк боллукъса», - дегенди эшек.
- Кюн кёрмеген, кюн кёрсе, кюндюз чыракъ джандырыр.
- Аш иеси бла татлыды.
- Кёкдеги болмаса, джердегин кёрмейди.
- Ашхы тенг джолгъа салыр, аман тенг джолдан тайдырыр.
- Иесиз малны бёрю ашар.
- Билими азны – ауузунда кирит.
- Аш хазыр болса, иш харам болур.
Профиль
|
|
|
|||