- Айтылгъан сёз ызына къайтмаз.
- Таякъ этден ётер, тил сюекден ётер.
- Уруну арты – къуру.
- Ёлюр джаннга, ёкюл джокъ.
- Оюмсуз атлагъан, аджалсыз ёлюр.
- «Ёгюз, джаргъа джууукъ барма, меннге джюк боллукъса», - дегенди эшек.
- Билмезни кёзю кёрмез, этмезни къулагъы эшитмез.
- Ёзденликни джайгъан – джокълукъ.
- Кийим тукъум сордурур.
- Мал кёб болса, джууукъ кёб болур.
- Акъыл неден да кючлюдю.
- Юйюнг бла джау болгъандан эсе, элинг бла джау бол.
- Джетген къыз джерли эшекни танымаз.
- Уллу сёзде уят джокъ.
- Нёгерсизни джолу узун.
- Джарашыу сюйген – джалынчакъ.
- Аман къатын алгъан, арыр, иги къатын алгъан джарыр.
- Биреуню тёрюнден, кесинги эшик артынг игиди.
- Къазанчы аман болса, къазаны къайнамаз.
- Эл ауузу – элия.
- Акъыл къартда, джашда тюйюлдю – башдады.
- Юре билмеген ит, къонакъ келтирир.
- Мухар, кеси тойса да, кёзю тоймаз.
- Тил джюрекге джол ишлейди.
- Аш кетер да бет къалыр.
- Аман адамны тепсинге олтуртсанг, къызынгы тилер.
- Эски джаугъа ышанма.
- Айтылгъан буйрукъ, сёгюлмез
- Ишни аллы бла къууанма да, арты бла къууан.
- Кюлме джашха – келир башха.
- Тёзгеннге, джабылгъан эшик ачылыр.
- Биреуге кёлтюрген таягъынг, кесинги башынга урур.
- Ач – эснер, ат – кишнер.
- Тели турса – той бузар.
- Тюз сёз баргъан сууну тыяр.
- Аз сёлешген, къайгъысыз турур.
- Къанны къан бла джуума, аманны аман бла къуума.
- Аууз сакълагъан – джан сакълар.
- Къууут – джелге, берне – бошха.
- Ашда уялгъан – мухар, ишде уялгъан – хомух.
- Ашатыргъа иш – ашхы, ишлетирге аш – ашхы.
- Эки къатын алгъан – эки ташны ортасына башын салгъан.
- Тёзген – тёш ашар!
- Ёлген аслан – сау чычхан.
- Джыйырма къойну юч джыйырма эбзе кюте эди.
- Тура эдим джата, къайдан чыкъды хата?
- Кюн кёрмеген, кюн кёрсе, кюндюз чыракъ джандырыр.
- Адам къаллай бир ишленмесе, аллай бир кесин уллу кёреди.
- Кесинг сынамагъан затны, адамгъа буюрма.
- От этилмеген джерден тютюн чыкъмайды.
Профиль
|
|
|||