- Накъырда – кертини келечиси.
- Ётюрюкчюню шагъаты – къатында.
- Окъ къызбайны джокълайды.
- Бир абыннган – минг сюрюнюр.
- Адебни адебсизден юрен.
- Тёрдеги кюлсе, эшикдеги ышарыр.
- Кёл ашады да, кеси ашады.
- Сакъламагъан затынга джолукъсанг, не бек къууанаса, не бек ачыйса.
- Къалгъан ишге къар джауар.
- Къатын къылыкъсыз, эр тынчлыкъсыз.
- Чыкълы кюнде чыкъмагъан, чыкъса къуру кирмеген.
- Тёрде – темир таякълы, къаяда – чыпчыкъ аякълы.
- Джюз элде джюз ёгюзюм болгъандан эсе, джюз джууугъум болсун.
- Байны къызы баймакъ болса да, юйде къалмаз!
- Къарнынг тойгъунчу аша да, белинг талгъынчы ишле.
- Аууздан келген, къолдан келсе, ким да патчах болур эди.
- Окъугъан озар, окъумагъан тозар.
- Чомарт къолда мал къалмаз.
- Тулпарлыкъ, билекден тюл – джюрекден.
- Адам туугъан джеринде, ит тойгъан джеринде.
- Айтханы чапыракъдан ётмеген.
- Кёзюнде тереги болгъан, чёбю болгъаннга кюле эди.
- Чакъырылгъанны аты, чакъырылмагъанны багъасы болур.
- Къайгъыны сюйген, къайгъы табар.
- Бичгенде ашыкъма, тикгенде ашыкъ.
- Адеб базарда сатылмаз.
- Тёзген – тёш ашар!
- Эки итни арасына сюек атма, эки адамны арасында сёз чыгъарма.
- Рысхысына кёре, джаш ёсер, къышлыгъына кёре, мал ёсер.
- Уллу къашыкъ эрин джыртар.
- Биреу къой излей, биреу той излей.
- Билмезни кёзю кёрмез, этмезни къулагъы эшитмез.
- Аякъларынгы джууургъанынга кёре узат.
- Орну джокъну – сыйы джокъ.
- Дууулдаса – бал чибин, къонса – къара чибин.
- Къатын байлыкъны сюер, эр саулукъну сюер.
- Эркиши – от, тиширыу – суу.
- Ач бёрюге мекям джокъ.
- Билим насыб берир, билим джолну керир.
- Адамны артындан къара сабан сюрме.
- Джарлыны эшигин махтагъан джабар.
- Бюгюн дуния кибик, тамбла ахыратды.
- Аллахха ийнаннган кишини, Аллах онгдурур ишин.
- Джауумдан сора, кюн кюйдюрюр, ётюрюкден сора, айыб кюйдюрюр.
- Кюл тюбюндеги от кёрюнмейди.
- Ашхы – джыяр, аман – джояр.
- Суу кетер, таш къалыр.
- Чомартны къолун джокълукъ байлар.
- Халкъны юйю – туугъан джери.
- Ач уят къоймаз.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72