- Къартха ушагъан джаш – акъыллы, джашха ушагъан къарт – тели.
- Тилде сюек болмаса да, сюек сындырыр.
- Джырчы ёлсе, джыры къалыр.
- Къыз тиширыу кеси юйюнде да къонакъды.
- Аманнга алтын чыдамаз.
- Къолунгдан къуймакъ ашатсанг да, атаны борчундан къутулмазса.
- Чомартны къолу берекет.
- Акъыл неден да кючлюдю.
- Аджашханны ызындагъы кёреди, джангылгъанны джанындагъы биледи.
- Келинин тута билмеген, къул этер, къызын тута билмеген, тул этер.
- Джаш болсун, къыз болсун, акъылы, саны тюз болсун.
- Кюлме джашха – келир башха.
- Къонакъ аман болса, къонакъбай джунчур
- Окъугъан – асыу, окъумагъан – джарсыу.
- Элни кючю – эмеген.
- Кёлю джокъну – джолу джокъ.
- Эски джаугъа ышанма.
- Суу ичген шауданынга тюкюрме.
- Атлыны кёрсе, джаяуну буту талыр.
- Аман къатын алгъан, арыр, иги къатын алгъан джарыр.
- Къызны минг тилер, бир алыр.
- Кийиминг бла танылма, адамлыкъ бла таныл.
- Олтуруб кёрюнмей эди да, ёрге туруб кёрюне эди.
- Мен да «сен», дейме, сен да «кесим», дейсе.
- Тюзлюк шохлукъну бегитир.
- Арба аугъандан сора, джол кёргюзтюучю кёб болур.
- Кёзю сокъурдан – къоркъма, кёлю сокъурдан – къоркъ.
- Кёкдеги болмаса, джердегин кёрмейди.
- Джаз бир кюнню джатсанг, къыш талай кюнню абынырса.
- Джиби бир къат джетмей эди да, эки къат тарта эди.
- Нёгер болсанг, тенг бол, тенг болмасанг, кенг бол.
- Ушамагъан – джукъмаз.
- Акъдан къара болмаз.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Байны къызы баймакъ болса да, юйде къалмаз!
- Ойнаб айтсанг да, эслеб айт.
- Ишни аллы бла къууанма да, арты бла къууан.
- Джарлы джети элни сёзюн этер.
- Бал чибинни ургъаны – ачы, балы – татлы.
- Къарт айтханны этмеген, къартаймаз.
- Телини эшигин, махтау джабар.
- Къарнынг бла ёч алма.
- Татлы сёз – балдан татлы.
- Тамырсыз терекге таянма – джыгъылырса.
- Аманны эки битли тону болур, бирин сеннге кийдирир, бирин кеси киер.
- Къонакъ хазыр болгъанлыкъгъа, къонакъбай хазыр тюлдю.
- Эркишиге тары кебек танг кёрюнюр.
- Кенгеш болса, уруш болмаз.
- Къуллукъчума, деб махтанма, къуллукъ – хаух джамчыды!
- Иши джокъну, сыйы джокъ.
Профиль
|
|
|
|||