- Ата Джуртуму башы болмасам да, босагъасында ташы болайым.
- Адамны адамлыгъы къыйынлыкъда айгъакъланады.
- Акъыл сабырлыкъ берир.
- Сууда джау джокъ, кёб сёзде магъана джокъ.
- Адеб джокъда, намыс джокъ.
- Ашхы тенг джолгъа салыр, аман тенг джолдан тайдырыр.
- Къаллай салам берсенг, аллай джууаб алырса.
- Насыб бютеу халкъны юлюшюдю.
- Биреуге аманлыкъны тилеме да, кесинге ашхылыкъны тиле.
- Ишленмеклик адамлыкъды.
- Ким бла джюрюсенг, аны кёзю бла кёрюнюрсе.
- Ёлмесенг да, къарт дамы болмазса?
- Атадан ёксюз – бир ёксюз, анадан ёксюз – эки ёксюз.
- Аман къатын сабий табса, бий болур…
- Кюн – узун, ёмюр – къысха.
- Ишлегенде эринме, ишде чолакъ кёрюнме.
- Ариуну – ауруу кёб.
- Джырчы ёлсе, джыры къалыр.
- Кюлме джашха – келир башха.
- Хата – гитчеден.
- Къартны сыйын кёрмеген, къартлыгъында сыйлы болмаз.
- Арба аугъандан сора, джол кёргюзтюучю кёб болур.
- Кюн кёрмеген, кюн кёрсе, кюндюз чыракъ джандырыр.
- Туз, гырджын аша, тюзлюк бла джаша.
- Ёлюр джаннга, ёкюл джокъ.
- Таш ата билмеген, башына урур.
- Байны къызы баймакъ болса да, юйде къалмаз!
- Кюл тюбюндеги от кёрюнмейди.
- Джети тилни билген джети кишиди.
- Къуллукъчума, деб махтанма, къуллукъ – хаух джамчыды!
- Ёлген ийнек сютлю болур.
- Къатын байлыкъны сюер, эр саулукъну сюер.
- Намысы болмагъанны, сыйы болмаз.
- Ушамагъан – джукъмаз.
- Чабакъгъа акъыл, табагъа тюшсе келеди.
- Ичимден чыкъды хата, къайры барайым сата?
- Гырджын – тепсини тамадасы.
- Тас болгъан бычакъны сабы – алтын.
- Эртде тургъан бла эртде юйленнген сокъуранмаз.
- Чакъырылмагъан къонакъ тёрге атламаз.
- Эки ойлашыб, бир сёлешген.
- Къыйынлы джети элни къайгъысын этер.
- Оюмсуз атлагъан, аджалсыз ёлюр.
- Адамны бетине къарама, адетине къара.
- Къар – келтирди, суу – элтди.
- Керти сёзге тёре джокъ.
- Эртде тургъан джылкъычыны эркек аты тай табар.
- Сакъалы текени да бар, мыйыгъы киштикни да бар.
- Биреуню эскиси биреуге джангы болмайды.
- Сёз сёзню айтдырыр.
Профиль
|
|
|||