- Эски джаугъа ышанма.
- Юре билмеген ит, къонакъ келтирир.
- Къатын байлыкъны сюер, эр саулукъну сюер.
- Кёб къычыргъандан – къоркъма, тынч олтургъандан – къоркъ.
- Бети – къучакълар, джюреги – бычакълар.
- Чомартны къолун джокълукъ байлар.
- Байлыкъ адамны сокъур этер.
- Суу ичген шауданынга тюкюрме.
- Акъылсызны джууукъгъа алма, акъыллыны кенгнге салма.
- Халкъгъа джарагъан, джарлы къалмаз.
- Къыйынлы джети элге оноу этер.
- Чакъырылмагъан къонакъ къачан кетерин сормаз.
- Ёнгкюч къууана барыр, джылай келир.
- Мухар, кеси тойса да, кёзю тоймаз.
- Аллахдан тилесенг, кёб тиле.
- Ата – баланы уясы.
- Суу да къайтады чыкъгъан джерине.
- Экеу тутушса, биреу джыгъылыр.
- Къартха ушагъан джаш – акъыллы, джашха ушагъан къарт – тели.
- Урама да – ёледи, сатама да – келеди.
- Ачыкъ джюрекге джол – ачыкъ.
- Айранын берсенг, челегин да къызгъанма.
- Джюрекге ариу – кёзге да ариу.
- Баргъанынга кёре болур келгенинг.
- Айтылгъан сёз ызына къайтмаз.
- Керти сёзге тёре джокъ.
- Кёбге таш атма.
- Ойнай билмеген, уруб къачар.
- Адеб базарда сатылмаз.
- Кеси юйюмде мен да ханма.
- Байлыкъ тауусулур, билим тауусулмаз.
- Башланнган иш битер, къымылдагъан тиш тюшер.
- Кёл – къызбай, къол – батыр.
- «Ма», - дегенни билмесенг, «бер», - дегенни билмезсе.
- Кёкдеги болмаса, джердегин кёрмейди.
- Кёзден кетген, кёлден да кетеди.
- Къыз келсе, джумуш эте келеди, къатын келсе, ушакъ эте келеди.
- Сормай – алма, чакъырылмай – барма.
- Байны оноуу, джарлыгъа джарамаз.
- Адамны бетине къарама, адетине къара.
- Джашда акъыл джокъ, къартда къарыу джокъ.
- Эл тойса, тоймагъан, эл къойса, къоймагъан.
- Ач келгенни – тойдур, кеч келгенни – къондур.
- Ашда уялгъан – мухар, ишде уялгъан – хомух.
- Бек ашыкъгъан меннге джетсин, дегенди аракъы.
- Эм ашхы къайын ана мамукъ бла башынгы тешер.
- Кийимни бир кюнню аясанг, минг кюннге джарар.
- Гыдай эчки суугъа къараб, мюйюзле кёрмесе, джашма алкъын, дегенди.
- Тил джюрекге джол ишлейди.
- Аз сёлешген, къайгъысыз турур.
Профиль
|
|
|||