- Махтаннган къыз, тойда джукълар.
- Къартны сыйын кёрмеген, къартлыгъында сыйлы болмаз.
- Бал ашаргъа сюе эсенг, чибин ургъаннга тёз.
- Тойну къарнашы – харс, джырны къарнашы – эжиу.
- Мухардан ач ычхынмаз.
- Аман эсирсе, юйюн ояр.
- Чакъырылгъанны аты, чакъырылмагъанны багъасы болур.
- Тил джюрекге джол ишлейди.
- Ачлыкъ отха секиртир.
- Чомарт джарлы болмаз.
- Къызны минг тилер, бир алыр.
- Эки ойлашыб, бир сёлешген.
- Къонагъынгы артмагъын алма да, алгъышын ал.
- Джыйырма къойну юч джыйырма эбзе кюте эди.
- Чакъырылмагъан джерге барма, чакъырылгъан джерден къалма.
- Адам туугъан джеринде, ит тойгъан джеринде.
- Атадан ёксюз – бир ёксюз, анадан ёксюз – эки ёксюз.
- Адеби болмагъан къыз – тузсуз хант.
- Биреуге кёлтюрген таягъынг, кесинги башынга урур.
- Кёзю сокъурдан – къоркъма, кёлю сокъурдан – къоркъ.
- Сескекли кесин билдирир.
- Ариу сёз – джаннга азыкъ, аман сёз – башха къазыкъ.
- Мен да «сен», дейме, сен да «кесим», дейсе.
- Джумушакъ терекни къурт ашар.
- Сютню башын джалагъан къутулур, тюбюн ичген тутулур.
- Байдан умут эте, джарлыдан ёгюз багъасы къорады.
- Окъугъан озар, окъумагъан тозар.
- Аш иеси бла татлыды.
- Адамны джюреги нени кёрюрге сюйсе, кёзю да аны кёрюрге ёч болады.
- Кирсизни – саны таза, халалны – къаны таза.
- Намыс болмагъан джерде, насыб болмаз.
- Эте билген, этген этеди, эте билмеген, юретген этеди!
- Аман къатын алгъан, арыр, иги къатын алгъан джарыр.
- Ана къойну – балагъа джандет.
- Аджал соруб келмез, келсе, къайтыб кетмез.
- Тёрде – темир таякълы, къаяда – чыпчыкъ аякълы.
- Чомартны къолун джокълукъ байлар.
- Аз айтсам, кёб ангылагъыз.
- Ишге юренсин къоллары, халкъ бла болсун джоллары.
- Ариу сёз джыланны орнундан чыгъарыр.
- Къызгъанчдан ычхыныр, мухардан ычхынмаз.
- Джырына кёре эжиую.
- Къазанда болса, чолпугъа чыгъар.
- Биреу ашаб къутулур, биреу джалаб тутулур.
- Ашына кёре табагъы, балына кёре къалагъы.
- Гитче джилтин уллу элни джандырыр.
- Адам сёзюнден белгили.
- Эрни эр этерик да, къара джер этерик да, тиширыуду.
- Ышармагъан – кюлмез, кюлмеген – къууанчны билмез.
- Суу да къайтады чыкъгъан джерине.
Профиль
|
|
|
|||