- Ашын ашагъанынгы, башын да сыйла.
- Адамны аты башхача, акъылы да башхады.
- Уруну арты – къуру.
- Кёлю джокъну – джолу джокъ.
- Къартны бурнун сюрт да, оноугъа тут.
- Иги – алгъыш этер, аман – къаргъыш этер.
- Татлы тилде – сёз ариу, чемер къолда – иш ариу.
- Ашхы атаны – джашы ашхы, ашхы ананы – къызы ашхы.
- Къатын къылыкъсыз, эр тынчлыкъсыз.
- Уллу айтханны этмеген – уллаймаз.
- Олтуруб кёрюнмей эди да, ёрге туруб кёрюне эди.
- Ач уят къоймаз.
- Айран тёгюлсе, джугъусу къалыр.
- Аш берме да, къаш бер.
- Джумушакъ сёз къаты таякъны сындырыр.
- Джукъу тёшек сайламайды.
- Билим къая тешер.
- Ёзденликни кёбю ётюрюк.
- Ариу сёз джыланны орнундан чыгъарыр.
- Намыс болмагъан джерде, насыб болмаз.
- Ойнай-ойнай кёз чыгъар.
- Арпа, будай – ащды, алтын, кюмюш а – ташды.
- Рысхысына кёре, джаш ёсер, къышлыгъына кёре, мал ёсер.
- Акъыллы эркиши атын махтар, акъылсыз эркиши къатынын махтар.
- Азыгъы аз, алгъа къабар, аты аман, алгъа чабар.
- Бастасын ашагъан, хантусун да ичер.
- Бал чибинни ургъаны – ачы, балы – татлы.
- Ётюрюкчюню шагъаты – къатында.
- Джумушакъ терекни къурт ашар.
- Адеб этмеген, адеб кёрмез.
- Кёл – къызбай, къол – батыр.
- Чабар ат – джетген къыз.
- Джырчы ёлсе, джыры къалыр.
- Аманны къуугъан, аманлыкъ табар.
- Ишлерге уял да, ашаргъа табма.
- Ишин билген, аны сыйын чыгъарады.
- Ашхы тенг джолгъа салыр, аман тенг джолдан тайдырыр.
- Ишге юренсин къоллары, халкъ бла болсун джоллары.
- Аман адам этегингден тутса, кес да къач.
- Мени джылытмагъан кюн, меннге тиймесин!
- Тойчу джашха къарама, къойчу джашха къара.
- Къозулугъунда тоймагъан, къойлугъунда тоймаз.
- Тюзлюк шохлукъну бегитир.
- Ашыкъгъан cуу, тенгизге джетмез.
- Накъырданы арты керти болур.
- Эртде тургъан джылкъычыны эркек аты тай табар.
- Мураты болгъанны джюрек тебюую башхады.
- Эки ойлашыб, бир сёлешген.
- Алгъанда – джууукъ, бергенде – джау.
- Экеу тутушса, биреу джыгъылыр.
Профиль
|
|
|||