- Аджалсыз ёлюм болмаз.
- Къарт айтханны этмеген, къартаймаз.
- Чабакъсыз кёлге къармакъ салгъанлыкъгъа, чабакъ тутмазса.
- Джарлыны эшигин махтагъан джабар.
- Акъыллы эркиши атын махтар, акъылсыз эркиши къатынын махтар.
- Арыгъан къош чамчы болур.
- Къайгъыны сюйген, къайгъы табар.
- Джети тилни билген джети кишиди.
- Хантына кёре тузу, юйюне кёре къызы.
- Тулпарлыкъ, билекден тюл – джюрекден.
- Термилгенинги табмазса, кюлгенинге тюберсе.
- Кёзюнде тереги болгъан, чёбю болгъаннга кюле эди.
- Ауругъаннга – кийик саулукъ, джетген къызгъа – чилле джаулукъ.
- Ойнай билмеген, оюн бузар.
- Уллу къазанда бишген эт, чий къалмаз.
- Ойнаб айтсанг да, эслеб айт.
- Босагъагъа джууукъ орун болса, ашыгъыб тёрге озма.
- Джылыгъа джылан илешир.
- Ёгюзню мюйюзюнден тутадыла, адамны сёзюнден тутадыла.
- Баш – акъыл ючюн, акъылман – халкъ ючюн.
- Ёпкелегенни ашы татлы болады.
- Баш болса, бёрк табылыр.
- Ат да турмайды бир териде.
- Тил – кесген бычакъ, сёз – атылгъан окъ.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Эте билген, этген этеди, эте билмеген, юретген этеди!
- Кечеси – аяз, кюню – къыш, джарлы къаргъагъа бир аш тюш!
- Аман киши кеси юйюнде – къонакъ.
- Артына баргъанны, къатына барма.
- Этни да ашады, бетни да ашады.
- Огъурлуну сёзю – суу, огъурсузну сёзю – уу.
- Окъуу – билимни ачхычы, окъуу – дунияны бачхычы.
- Ёлюр джаннга, ёкюл джокъ.
- Тил джюрекге джол ишлейди.
- Чакъырылгъанны аты, чакъырылмагъанны багъасы болур.
- Ауузу аманнга «иги», деме.
- Ойнай билмеген, уруб къачар.
- Юй кюйдю да, кюйюз чыкъды, ортасындан тюйюш чыкъды.
- Ариу сёз джыланны орнундан чыгъарыр.
- Адамны адамлыгъы къыйынлыкъда айгъакъланады.
- Тилде сюек болмаса да, сюек сындырыр.
- Нёгерсизни джолу узун.
- Джангыз терек къынгыр ёсер.
- Арпа, будай – ащды, алтын, кюмюш а – ташды.
- Адамны артындан къара сабан сюрме.
- Къартха ушагъан джаш – акъыллы, джашха ушагъан къарт – тели.
- Эки элинги тыйсанг, джети элде махталырса.
- Ишни аллы бла къууанма да, арты бла къууан.
- Башда акъыл болмаса, эки аякъгъа кюч джетер.
- Тенги кёбню джау алмаз, акъылы кёбню дау алмаз.
Профиль
|
|
|
|||