- Джахил болса анасы, не билликди баласы?
- Тойгъанлыкъ къойгъа джарашады.
- Бал – татлы, балдан да бала – татлы.
- Эм ашхы къайын ана мамукъ бла башынгы тешер.
- Гыдай эчки суугъа къараб, мюйюзле кёрмесе, джашма алкъын, дегенди.
- Къартны бурнун сюрт да, оноугъа тут.
- Айтхан сёзюне табылгъан.
- Окъумагъан сокъурду, сокъур ташха абыныр!
- Сормай – алма, чакъырылмай – барма.
- Нарт сёз къарт болмаз.
- Битмегеннге сакъал – танг.
- Ёгюзню мюйюзюнден тутадыла, адамны сёзюнден тутадыла.
- Эл элде бирер малынг болгъандан эсе, бирер тенгинг болсун.
- Элиб деген, элге болушур.
- Джан саулукъ бермей, сан саулукъ бермезсе.
- Ёлген эшек бёрюден къоркъмайды.
- Келгинчи, къонакъ уялыр, келгенден сора, къонакъбай уялыр.
- Эки ойлашыб, бир сёлешген.
- Окъугъан – асыу, окъумагъан – джарсыу.
- Джангыз терек къынгыр ёсер.
- Адамны аты башхача, акъылы да башхады.
- Хазыр ашха – терен къашыкъ.
- Иги – алгъыш этер, аман – къаргъыш этер.
- Джылар джаш, атасыны сакъалы бла ойнар.
- Эртде тургъан бла эртде юйленнген сокъуранмаз.
- Алма терегинден кери кетмез.
- Таш бла ургъанны, аш бла ур.
- Тыш элде солтан болгъандан эсе, кесинги элде олтан болгъан игиди!
- Халкъны джырын джырласанг, халкъ санга эжиу этер.
- Иги сёз – джаннга азыкъ, аман сёз башха – къазыкъ.
- Чакъырылмай келген къонакъ сыйланмай кетер.
- Атлыны ашхысы, ат тизгининден билинир
- Юй кюйдю да, кюйюз чыкъды, ортасындан тюйюш чыкъды.
- Тёрде – темир таякълы, къаяда – чыпчыкъ аякълы.
- Ач отунчуну ачыуу – бурнунда.
- Адебни адебсизден юрен.
- Билимден уллу байлыкъ джокъду.
- Кийиминг бла танылма, адамлыкъ бла таныл.
- Юйюнгден чыкъдынг – кюнюнгден чыкъдынг.
- Бойнуму джети джерден кессенг да, мен ол ишни этеллик тюлме.
- Босагъагъа джууукъ орун болса, ашыгъыб тёрге озма.
- Къолунгдан къуймакъ ашатсанг да, атаны борчундан къутулмазса.
- Ашыкъгъанны этеги бутуна чырмалыр.
- Къонакъ хазыр болгъанлыкъгъа, къонакъбай хазыр тюлдю.
- Тик ёргени, тик энгишгеси да болады.
- Уруну арты – къуру.
- Ёлмесенг да, къарт дамы болмазса?
- Кесине оноу эте билмеген, халкъына да эте билмез.
- Джашны джигитлиги сорулур, къызны джигерлиги сорулур.
- Дуния малгъа сатылма, кесингден телиге къатылма.
Профиль
|
|
|||