- Эки итни арасына сюек атма, эки адамны арасында сёз чыгъарма.
- Садакъачыны джаны – къапчыгъында.
- Чыкълы кюнде чыкъмагъан, чыкъса къуру кирмеген.
- Игиге айтсанг – билир, аманнга айтсанг – кюлюр.
- Адамны аманы адамны бети бла ойнар.
- Кюлме джашха – келир башха.
- Ашатыргъа иш – ашхы, ишлетирге аш – ашхы.
- Келлик заман – къартлыкъ келтирир, кетген заман – джашлыкъ ёлтюрюр.
- Ашхы – джыяр, аман – джояр.
- Татлы тилде – сёз ариу, чемер къолда – иш ариу.
- Берекет берсин деген джерде, берекет болур.
- Элде адам къалмаса, ит тахтагъа минер.
- Къалгъан ишге къар джауар.
- Джауумдан сора, кюн кюйдюрюр, ётюрюкден сора, айыб кюйдюрюр.
- Сабийни джумушха джибер да, ызындан бар.
- Эркишини аманы тиширыуну джылатыр.
- Ата Джуртун танымагъан, атасын да танымаз.
- Адамны адамлыгъы къыйынлыкъда айгъакъланады.
- Адамны бетине къарама, адетине къара.
- Бюгюн дуния кибик, тамбла ахыратды.
- Таякъ этден ётер, тил сюекден ётер.
- Ачыкъ джюрекге джол – ачыкъ.
- Ач бёрюге мекям джокъ.
- Тенги кёбню джау алмаз, акъылы кёбню дау алмаз.
- Джырына кёре эжиую.
- Ана къойну – балагъа джандет.
- Джаным-тиним – окъуу, билим.
- Байма, деб да, къууанма, джарлыма, деб да, джылама.
- Байны оноуу, джарлыгъа джарамаз.
- Тойну къарнашы – харс, джырны къарнашы – эжиу.
- Тай асырагъан, атха минер.
- Билеги кючлю, бирни джыгъар, билими кючлю, мингни джыгъар.
- Малны кют, джерни тюрт.
- Ашхы тенг джолгъа салыр, аман тенг джолдан тайдырыр.
- Джангыз терек къынгыр ёсер.
- Кеси юйюмде мен да ханма.
- Экеу тутушса, биреу джыгъылыр.
- Къонакъны къачан кетерин сорма, къачан келлигин сор.
- Къонакъ хазыр болгъанлыкъгъа, къонакъбай хазыр тюлдю.
- Къан бла кирген, джан бла чыгъар.
- Ашлыкъ – бюртюкден, джюн – тюкден.
- Джылыгъа джылан илешир.
- Бети – къучакълар, джюреги – бычакълар.
- Таукел адам тау тешер.
- Ашда уялгъан – мухар, ишде уялгъан – хомух.
- Байлыкъ тауусулур, билим тауусулмаз.
- Къонакъ кёб келюучю юйню, къазаны отдан тюшмез.
- Уллу сёлешме да, уллу къаб.
- Айтылгъан сёз ызына къайтмаз.
- Уллу суу бла уллу ауруудан башынгы сакъла.
Профиль
|
|
|||