- Насыблы элин сюер, насыбсыз кесин сюер.
- Кёб ант этген, кёб ётюрюк айтыр.
- Тынгылагъан тынгы бузар.
- Баш – акъыл ючюн, акъылман – халкъ ючюн.
- Адебсиз адам – джюгенсиз ат.
- Аз сёлеш, кёб ишле.
- Элге къуллукъ этмеген, элге ие болмаз.
- Гитче джилтин уллу элни джандырыр.
- Адеб джокъда, намыс джокъ.
- Билген билмегенни юретген адетди.
- Мал кёб болса, джууукъ кёб болур.
- Башы джабылгъан челекге, кир тюшмез.
- Ёмюрлюк шохлукъну джел элтмез.
- Сангырау къулакъ эл бузар.
- Ишленмеген джаш – джюгенсиз ат, ишленмеген къыз – тузсуз хант.
- Урунуу – насыбны анасы.
- Игини сыйлагъан адетди.
- Тамырсыз терекге таянма – джыгъылырса.
- Адеб этмеген, адеб кёрмез.
- Къууут – джелге, берне – бошха.
- Рысхы джалгъанды: келген да этер, кетген да этер.
- Акъыллы – эл иеси, тели – эл баласы.
- Ишге юренсин къоллары, халкъ бла болсун джоллары.
- Къралынгы – душмандан, башынгы от бла суудан сакъла.
- Биреуню тёрюнден, кесинги эшик артынг игиди.
- Шапа кёб болса, аш татымсыз болур.
- Илму – джашауну джолу.
- Къатын къылыкъсыз, эр тынчлыкъсыз.
- Атлыны кёрсе, джаяуну буту талыр.
- Къатын байлыкъны сюер, эр саулукъну сюер.
- Адам сёзге тынгыла, акъыл сёзню ангыла.
- Иги адам абынса да, джангылмаз.
- Бастасын ашагъан, хантусун да ичер.
- Ауузу аманнга «иги», деме.
- Гырджын – тепсини тамадасы.
- Ашлыкъ – бюртюкден, джюн – тюкден.
- Джылыгъа джылан илешир.
- Эшекге миннген – биринчи айыб, андан джыгъылгъан – экинчи айыб.
- Хар ишни да аллы къыйынды.
- Ёгюзню мюйюзюнден тутадыла, адамны сёзюнден тутадыла.
- Къонакъ аман болса, къонакъбай джунчур
- Джарлы тюеге минсе да, ит къабар.
- Уллу къашыкъ эрин джыртар.
- Ашын ашагъанынгы, башын да сыйла.
- Къатыны харакетли болса, эри къымсыз болур.
- Окъугъан озар, окъумагъан тозар.
- Бир онгсуз адам адет чыгъарды, деб эштирик тюлсе.
- Къонакъ болсанг, ийнакъ бол.
- Ач келгенни – тойдур, кеч келгенни – къондур.
- Аман эсирсе, юйюн ояр.
Профиль
|
|
|||