- Ёксюзню тилеги къабыл болур.
- Тыш элде солтан болгъандан эсе, кесинги элде олтан болгъан игиди!
- Айранын берсенг, челегин да къызгъанма.
- Зарда марда джокъ.
- Иги сеники эсе да, сюйген кесимикин этеме.
- Ана къойну – балагъа джандет.
- Сёлеш деб шай берген, тохта деб, сом берген.
- Джумушакъ терекни къурт ашар.
- Босагъа таш юйге кирмей эди, тыбыр таш эшикге чыкъмай эди.
- Ач – эснер, ат – кишнер.
- Ишни аллы бла къууанма да, арты бла къууан.
- Ёлмесенг да, къарт дамы болмазса?
- Сютню башын джалагъан къутулур, тюбюн ичген тутулур.
- Ачылгъан эт джабылыр, кёрген кёз унутмаз.
- Къонакъ болсанг, ийнакъ бол.
- Кёб къычыргъандан – къоркъма, тынч олтургъандан – къоркъ.
- Ауругъан – джашаудан умутчу.
- Ашхы сёз таш тешер.
- Азыгъы аз, алгъа къабар, аты аман, алгъа чабар.
- Аманнга алтын чыдамаз.
- Кёб ант этген, кёб ётюрюк айтыр.
- Ёгюзню мюйюзлери ауурлукъ этмейдиле.
- Ёлюр джаннга, ёкюл джокъ.
- Киштикге къанат битсе, чыпчыкъ къалмаз эди.
- Ач къалгъандан, кеч къалгъан къолай.
- Юреннген ауруу къалмаз.
- Бир онгсуз адам адет чыгъарды, деб эштирик тюлсе.
- Ариу сёз – джаннга азыкъ, аман сёз – башха къазыкъ.
- Джиби бир къат джетмей эди да, эки къат тарта эди.
- Орну джокъну – сыйы джокъ.
- Ата Джуртуму башы болмасам да, босагъасында ташы болайым.
- Кийимни бир кюнню аясанг, минг кюннге джарар.
- Джигер – джаннга къыйынлыкъ.
- Адамны бетине къарама, адетине къара.
- Бети – къучакълар, джюреги – бычакълар.
- Айыбны суу бла джууалмазса.
- Бичгенде ашыкъма, тикгенде ашыкъ.
- Джети тилни билген джети кишиди.
- Къобан да къуру да къобханлай турмайды, адам да къуру да патчахлай турмайды.
- Тилде сюек болмаса да, сюек сындырыр.
- Ишге юренсин къоллары, халкъ бла болсун джоллары.
- Ашатыргъа иш – ашхы, ишлетирге аш – ашхы.
- Кесине гебен этелмеген, биреуге черен эте эди.
- Ата Джуртча джер болмаз, туугъан элча эл болмаз.
- Эл ауузу – элия.
- Элге къуллукъ этмеген, элге ие болмаз.
- Чёбню кёлтюрсенг, тюбюнден сёз чыгъар.
- Телиге акъыл салгъандан эсе, ёлгеннге джан салырса.
- Ашда уялгъан – мухар, ишде уялгъан – хомух.
- Уллу сёлешме да, уллу къаб.
Профиль
|
|
|
|||