- Къарнынг бла ёч алма.
- Уллу айтханны этмеген – уллаймаз.
- Хаухну атма, ёнгкючню сатма.
- Тыш элде солтан болгъандан эсе, кесинги элде олтан болгъан игиди!
- Алтыда кюлмеген, алтмышда кюлмез.
- Кёб джашагъан – кёб билир.
- Биреуге аманлыкъ этиб, кесинге игилик табмазса.
- Ата Джуртча джер болмаз, туугъан элча эл болмаз.
- Рысхы – насыбха къор.
- Билгенни къолу къарны джандырыр.
- Орну джокъну – сыйы джокъ.
- Мал кёб болса, джууукъ кёб болур.
- Битмегеннге сакъал – танг.
- Къуру гыбыт бек дыгъырдар.
- Ойнай билмеген, оюн бузар.
- Бюгюн дуния кибик, тамбла ахыратды.
- Джерни букъусу кёкге къонмаз.
- Сабий кёргенин унутмаз.
- Юй ишлеген балта эшикде къалыр.
- Келгинчи, къонакъ уялыр, келгенден сора, къонакъбай уялыр.
- Эл тойса, тоймагъан, эл къойса, къоймагъан.
- Минг тенг да азды, бир джау да кёбдю.
- Ёнгкюч къууана барыр, джылай келир.
- Ашлыкъны арба юйге келтирир, чана базаргъа элтир.
- Дууулдаса – бал чибин, къонса – къара чибин.
- Уллу сёлешме да, уллу къаб.
- Бек анасы джыламаз.
- Къатыны харакетли болса, эри къымсыз болур.
- Ёлген аслан – сау чычхан.
- Чёбню кёлтюрсенг, тюбюнден сёз чыгъар.
- Эринчекге кюн узун.
- Бал ашаргъа сюе эсенг, чибин ургъаннга тёз.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Ёзденликни джайгъан – джокълукъ.
- Арбаз къынгырды да, ийнек сауалмайма.
- Ишлемеген – тишлемез.
- Аджашхан тёгерек айланыр.
- Хар зат кесини орнуна иги.
- Байлыкъ тауусулур, билим тауусулмаз.
- Адам сёзге тынгыла, акъыл сёзню ангыла.
- Окъугъан озар, окъумагъан тозар.
- Кенгеш болса, уруш болмаз.
- Эки ойлашыб, бир сёлешген.
- Азыгъы аз, алгъа къабар, аты аман, алгъа чабар.
- Накъырданы арты керти болур.
- Акъдан къара болмаз.
- Аман адамны тепсинге олтуртсанг, къызынгы тилер.
- Ат басханны джер билед.
- Артына баргъанны, къатына барма.
- Хатерли къул болур.
Профиль
|
|
|
|||