- Орну джокъну – сыйы джокъ.
- Кёз – сюйген джерде, къол – ауругъан джерде.
- Акъыл аздырмаз, билим тоздурмаз.
- Джан саулукъ бермей, сан саулукъ бермезсе.
- Къонакъны къачан кетерин сорма, къачан келлигин сор.
- Намысы джокъну – дуниясы джокъ.
- Мал тутхан – май джалар.
- Къартны сыйын кёрмеген, къартлыгъында сыйлы болмаз.
- Кесинге джетмегенни, кёб сёлешме.
- Айыбны суу бла джууалмазса.
- Зар адамны насыбы болмаз.
- Тилчиден кери бол.
- Тойгъан джерге джети къайт.
- Экеулен сёлеше тура эселе, орталарына барыб кирме.
- Ишни ахырын ойламай, аллын башлама.
- Эр сокъур болсун, къатын тилсиз болсун.
- Этек чакъмакълары баш джаргъан, сёлешген сёзлери таш джаргъан.
- Баш болса, бёрк табылыр.
- Аджашхан тёгерек айланыр.
- Телиге акъыл салгъандан эсе, ёлгеннге джан салырса.
- Урама да – ёледи, сатама да – келеди.
- Аллахха ийнаннган кишини, Аллах онгдурур ишин.
- Къозулугъунда тоймагъан, къойлугъунда тоймаз.
- Ариу сёз аурууунгу алыр.
- Туз, гырджын аша, тюзлюк бла джаша.
- Сагъыш – къартлыкъгъа сюйюмчю.
- Джырчы джырчыгъа – къарнаш.
- Эки къатын алгъанны къулагъы тынгнгаймаз.
- Бети къызарыучу адамны, джюреги харам болмаз.
- Къарнынг бла ёч алма.
- Джауумдан сора, кюн кюйдюрюр, ётюрюкден сора, айыб кюйдюрюр.
- Намысы болмагъанны, сыйы болмаз.
- Кёлсюзден сёзсюз тууар.
- Гугук кесини атын айтыб къычыргъанча, мен, мен деб нек тураса?
- Чакъырылгъанны аты, чакъырылмагъанны багъасы болур.
- Ашхы тенг джолгъа салыр, аман тенг джолдан тайдырыр.
- Чомартха хар кюн да байрамды.
- Адамны аты башхача, акъылы да башхады.
- Ашхы атаны – джашы ашхы, ашхы ананы – къызы ашхы.
- Къарт бла баш аша, джаш бла аякъ аша.
- Ачлыкъ отха секиртир.
- Ауузу аманнга «иги», деме.
- Кёкдеги болмаса, джердегин кёрмейди.
- Ётюрюкню къуйругъу – бир тутум.
- Тойгъа барсанг, тоюб бар, эски тонунгу къоюб бар.
- Къралынгы – душмандан, башынгы от бла суудан сакъла.
- Айран ичген – къутулду, джугъусун джалагъан – тутулду.
- Рысхы – насыбха къор.
- Чоюнну башы ачыкъ болса, итге уят керекди.
- Сёз садакъдан кючлюдю.
Профиль
|
|
|
|||