- Аманны тукъумуна къарама, игини тукъумун сорма.
- Бёрю да ач къалмасын, эчки да ашалмасын.
- Джаз бир кюнню джатсанг, къыш талай кюнню абынырса.
- Ойнай билмеген, уруб къачар.
- Ашхы сёз таш тешер.
- Ёлген эшек бёрюден къоркъмайды.
- Керек ташны ауурлугъу джокъ.
- Халкъгъа джарагъан, джарлы къалмаз.
- Тойгъан антын унутур.
- Чомарт къолда мал къалмаз.
- Акъдан къара болмаз.
- Таякъ этден ётер, тил сюекден ётер.
- Джауумдан сора, кюн кюйдюрюр, ётюрюкден сора, айыб кюйдюрюр.
- «Ёгюз, джаргъа джууукъ барма, меннге джюк боллукъса», - дегенди эшек.
- Келгинчи, къонакъ уялыр, келгенден сора, къонакъбай уялыр.
- Окъдан джара эртде-кеч болса да бителир, сёз джара, ёмюрге къалыр.
- Ашхы – джыяр, аман – джояр.
- Къыз тиширыу кеси юйюнде да къонакъды.
- Сормай – алма, чакъырылмай – барма.
- Эшекни не къадар тюйсенг да, ат болмаз.
- Ач къарным, тынч къулагъым.
- Адамны джюреги нени кёрюрге сюйсе, кёзю да аны кёрюрге ёч болады.
- Эки ойлашыб, бир сёлешген.
- Сескекли кесин билдирир.
- Къарыусузгъа кюлме, онгсузгъа тийме.
- Ишленмеген джаш – джюгенсиз ат, ишленмеген къыз – тузсуз хант.
- Джогъун бар этген, барын бал этген.
- Бек ашыкъгъан меннге джетсин, дегенди аракъы.
- Джыйырма къойну юч джыйырма эбзе кюте эди.
- Эшекге миннген – биринчи айыб, андан джыгъылгъан – экинчи айыб.
- Хатерли къул болур.
- Босагъа таш юйге кирмей эди, тыбыр таш эшикге чыкъмай эди.
- Ашха уста, юйюнде болсун
- Кёз – сюйген джерде, къол – ауругъан джерде.
- Билмегенинги, билгеннге сор.
- Ана къойну – балагъа джандет.
- Башы джабылгъан челекге, кир тюшмез.
- Окъугъанны бети джарыкъ.
- Эллинг бла джау болсанг да, юйюнг бла джау болма.
- Тамырсыз терекге таянма – джыгъылырса.
- Къарт болгъан джерде, берекет болур, сабий болгъан джерде, оюн болур.
- Ашда уялгъан – мухар, ишде уялгъан – хомух.
- Эл тойса, тоймагъан, эл къойса, къоймагъан.
- Зар адам ашынгы ашар, кесинги сатар.
- Чакъырылмай келген къонакъ сыйланмай кетер.
- Адамны бетине къарама, адетине къара.
- Кёрмегеннге кебек – танг, битмегеннге сакъал – танг.
- Байны къызы баймакъ болса да, юйде къалмаз!
- Чабакъсыз кёлге къармакъ салгъанлыкъгъа, чабакъ тутмазса.
- Байлыкъ адамны сокъур этер.
Профиль
|
|
|
|||