- Экиндини кеч къылсанг, чабыб джетер ашхам.
- Суу кетер, таш къалыр.
- Къонакъ хазыр болгъанлыкъгъа, къонакъбай хазыр тюлдю.
- Кёрмегеннге кебек – танг, битмегеннге сакъал – танг.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Къазанчы аман болса, къазаны къайнамаз.
- Кюл тюбюндеги от кёрюнмейди.
- Хар зат кесини орнуна иги.
- Терслик кетер, тюзлюк джетер.
- Тынгылагъан тынгы бузар.
- Кимни – тили, тиши онглу, кимни – къолу, иши онглу.
- Керилген да, ургъан кибикди.
- Сакъ юйюне сау барыр.
- Юйлю уругъа ит чабмаз.
- Къайтырыкъ эшигинги, къаты уруб чыкъма.
- Башынга джетмегенни сорма.
- Къумурсхала джыйылсала, пилни да джыгъадыла.
- Иги болса, тамадама – махтау, аман болса, меннге – айыб.
- Къызын тута билмеген, тул этер, джашын тута билмеген, къул этер.
- Джолда аягъынга сакъ бол, ушакъда тилинге сакъ бол.
- Хата – гитчеден.
- Тура эдим джата, къайдан чыкъды хата?
- Терек ауса, отунчу – кёб.
- Эки къатын алгъан – эки ташны ортасына башын салгъан.
- Къонакъ аман болса, къонакъбай джунчур
- Акъыллы – эл иеси, тели – эл баласы.
- Уллу атлама – абынырса, уллу къабма – къарылырса.
- Къыз келсе, джумуш эте келеди, къатын келсе, ушакъ эте келеди.
- Ишге юренсин къоллары, халкъ бла болсун джоллары.
- Окъуу – билимни ачхычы, окъуу – дунияны бачхычы.
- Тойну къарнашы – харс, джырны къарнашы – эжиу.
- Элде адам къалмаса, ит тахтагъа минер.
- Джеринден айырылгъан – джети джылар, джуртундан айырылгъан – ёлгюнчю джылар.
- Ёгюзню мюйюзюнден тутадыла, адамны сёзюнден тутадыла.
- Чёбню кёлтюрсенг, тюбюнден сёз чыгъар.
- Джыгъылгъанны сырты джерден тоймаз.
- Тамырсыз терекге таянма – джыгъылырса.
- Артына баргъанны, къатына барма.
- Сёз къанатсыз учар.
- Рысхысына кёре, джаш ёсер, къышлыгъына кёре, мал ёсер.
- Джиби бир къат джетмей эди да, эки къат тарта эди.
- Мал тутхан – май джалар.
- Сабийликде юретмесенг, уллу болса – тюзелмез.
- Алтыда кюлмеген, алтмышда кюлмез.
- Джашны джигитлиги сорулур, къызны джигерлиги сорулур.
- Атынг аманнга чыкъгъандан эсе, джанынг тамагъынгдан чыкъсын.
- Эл тойса, тоймагъан, эл къойса, къоймагъан.
- Кёзню ачылгъаны – иги, ауузну джабылгъаны – иги.
- Рысхы джалгъанды: келген да этер, кетген да этер.
- Аууздан келген, къолдан келсе, ким да патчах болур эди.
Профиль
|
|
|
|||