- Аманны къуугъан, аманлыкъ табар.
- Тилчи тилден къаныкъмаз.
- Аджал соруб келмез, келсе, къайтыб кетмез.
- Айтылгъан буйрукъ, сёгюлмез
- Юре билмеген ит, къонакъ келтирир.
- Ёзденликни кёбю ётюрюк.
- Бир онгсуз адам адет чыгъарды, деб эштирик тюлсе.
- Иги джашны ышаны – аз сёлешиб, кёб тынгылар.
- Ашха уста, юйюнде болсун
- «Ма», - дегенни билмесенг, «бер», - дегенни билмезсе.
- Тешик этген тынчды, аны джамагъан къыйынды.
- Сабийликде юретмесенг, уллу болса – тюзелмез.
- «Ёгюз, джаргъа джууукъ барма, меннге джюк боллукъса», - дегенди эшек.
- Ата Джуртуму башы болмасам да, босагъасында ташы болайым.
- Аманны эки битли тону болур, бирин сеннге кийдирир, бирин кеси киер.
- Акъыллы айтыр эди, акъылсыз къоймайды.
- Ач къарным, тынч къулагъым.
- Бек ашыкъгъан меннге джетсин, дегенди аракъы.
- Адам къаллай бир ишленмесе, аллай бир кесин уллу кёреди.
- Аман эсирсе, юйюн ояр.
- Ёлген эшек бёрюден къоркъмайды.
- Джауумдан сора, кюн кюйдюрюр, ётюрюкден сора, айыб кюйдюрюр.
- Къанны къан бла джуума, аманны аман бла къуума.
- Билим къая тешер.
- Уллу къазанда бишген эт, чий къалмаз.
- Битмегеннге сакъал – танг.
- Уясында не кёрсе, учханында аны этер.
- Къыйынлы джети элге оноу этер.
- Рысхысына кёре, джаш ёсер, къышлыгъына кёре, мал ёсер.
- Онгсузну – джакъла, тенгликни – сакъла.
- Керек ташны ауурлугъу джокъ.
- Баланы адам этген анады.
- Чабар ат – джетген къыз.
- Иги бла джюрюсенг, джетерсе муратынга, аман бла джюрюсенг, къалырса уятха.
- Биреу ашаб къутулур, биреу джалаб тутулур.
- Башда акъыл болмаса, эки аякъгъа кюч джетер.
- Кийимни бичсенг, кенг бич, тар этген къыйын тюлдю.
- Кёзю сокъурдан – къоркъма, кёлю сокъурдан – къоркъ.
- Узун джолну барсанг, бюгюн келирсе, къысха джолну барсанг, тамбла келирсе.
- Накъырда – кертини келечиси.
- Адеб джокъда, намыс джокъ.
- Ашыкъгъанны этеги бутуна чырмалыр.
- Эки къатын алгъан – эки ташны ортасына башын салгъан.
- Баш – акъыл ючюн, акъылман – халкъ ючюн.
- Джарлы тюеге минсе да, ит къабар.
- Къарнынг тойгъунчу аша да, белинг талгъынчы ишле.
- Чакъырылмагъан къонакъ къачан кетерин сормаз.
- Уллу суу бла уллу ауруудан башынгы сакъла.
- Тёзген – тёш ашар!
- Джюрекден джюрекге джол барды.
Профиль
|
|
|||