- Кирсизни – саны таза, халалны – къаны таза.
- Керилген да, ургъан кибикди.
- Джангыз торгъай джырламаз.
- Тёгюлген тюгел джыйылмайды.
- Акъыл аздырмаз, билим тоздурмаз.
- Келинни – келгинчи, бёркню кийгинчи кёр.
- Уллу сёзде уят джокъ.
- Босагъа таш юйге кирмей эди, тыбыр таш эшикге чыкъмай эди.
- Тёзген – тёш ашар!
- Бозанг болмагъан джерге, къалагъынгы сукъма.
- Чоюнну башы ачыкъ болса, итге уят керекди.
- Аманны эки битли тону болур, бирин сеннге кийдирир, бирин кеси киер.
- Джетген къыз джерли эшекни танымаз.
- Чабакъ башындан чирийди.
- Башы джабылгъан челекге, кир тюшмез.
- Биреуню тёрюнден, кесинги эшик артынг игиди.
- Узун джолну барсанг, бюгюн келирсе, къысха джолну барсанг, тамбла келирсе.
- Тамбла алтындан бюгюн багъыр ашхы.
- Ишлегенде эринме, ишде чолакъ кёрюнме.
- Телини эшигин, махтау джабар.
- Къазанны башы ачыкъ болса, итге уят керекди.
- Джарлыны тону джаз битер.
- Ашхы сёз таш тешер.
- Адамны сабийин сюйген джюреги, бычакъча, джитиди.
- Бичгенде ашыкъма, тикгенде ашыкъ.
- Джауумдан сора, кюн кюйдюрюр, ётюрюкден сора, айыб кюйдюрюр.
- Зар адам ашынгы ашар, кесинги сатар.
- Ауругъан – джашаудан умутчу.
- Ашын ашагъанынгы, башын да сыйла.
- Тойгъан джерге джети къайт.
- Джогъун бар этген, барын бал этген.
- Джашда акъыл джокъ, къартда къарыу джокъ.
- Байлыкъ адамны сокъур этер.
- Кёз – сюйген джерде, къол – ауругъан джерде.
- Эки ойлашыб, бир сёлешген.
- Ашаса, ашамаса да, бёрюню ауузу – къан.
- Тёзгеннге, джабылгъан эшик ачылыр.
- Чомарт бергенин айтмаз.
- Таукел тауну аудурур.
- Тёрдеги кюлсе, эшикдеги ышарыр.
- Адамны адамлыгъы къыйынлыкъда айгъакъланады.
- Къумурсхала джыйылсала, пилни да джыгъадыла.
- Таш ата билмеген, башына урур.
- Ат да турмайды бир териде.
- Намыс болмагъан джерде, насыб болмаз.
- Къолу уллу – асыу, аягъы уллу – джарсыу.
- Нёгерсизни джолу узун.
- Сабыр джетер муратха, сабырсыз къалыр уятха.
- Адеб базарда сатылмаз.
- Иги адам абынса да, джангылмаз.
Профиль
|
|
|||