- Тенги кёбню джау алмаз, акъылы кёбню дау алмаз.
- Тамырсыз терекге таянма – джыгъылырса.
- Хунаны тюбюн къазсанг, юсюнге ауар.
- Биреуню тёрюнден, кесинги эшик артынг игиди.
- Ойнай-ойнай кёз чыгъар.
- Кесине оноу эте билмеген, халкъына да эте билмез.
- Ишленмеклик адамлыкъды.
- Сагъыш – къартлыкъгъа сюйюмчю.
- Уллу къашыкъ эрин джыртар.
- Аууздан келген, къолдан келсе, ким да патчах болур эди.
- Аякъларынгы джууургъанынга кёре узат.
- Бал ашаргъа сюе эсенг, чибин ургъаннга тёз.
- Душманны тышы – акъ, ичи – къара.
- Халкъны джырын джырласанг, халкъ санга эжиу этер.
- Къонакъ аз олтурур, кёб сынар.
- Ач – эснер, ат – кишнер.
- Ачны эсинде – аш.
- Баш – акъыл ючюн, акъылман – халкъ ючюн.
- Минг тенг да азды, бир джау да кёбдю.
- Къыйынлы джети элге оноу этер.
- Эртде тургъан джылкъычыны эркек аты тай табар.
- Тас болгъан бычакъны сабы – алтын.
- Акъыллы айтыр эди, акъылсыз къоймайды.
- Ач отунчуну ачыуу – бурнунда.
- Ариу сёз – къылычдан джити.
- Чомартха Тейри да борчлуду.
- Ана – юйню кюн джарыгъы.
- Босагъагъа джууукъ орун болса, ашыгъыб тёрге озма.
- Тилчи тилден къаныкъмаз.
- Битмегеннге сакъал – танг.
- Къартны бурнун сюрт да, оноугъа тут.
- Сабий кёргенин унутмаз.
- Кёлю джокъну – джолу джокъ.
- Аллахха ийнаннган кишини, Аллах онгдурур ишин.
- Билген билмегенни юретген адетди.
- Башы ишлегенни, ауузу да ишлер.
- Суу кетер, таш къалыр.
- Нафысынгы айтханын этме, намысынгы айтханын эт.
- Экиндини кеч къылсанг, чабыб джетер ашхам.
- Чомарт къонакъ юй иесин сыйлар.
- Иги джашны ышаны – аз сёлешиб, кёб тынгылар.
- Эр абынмай, эл танымаз.
- Кеси юйюмде мен да ханма.
- Ашыкъгъанны этеги бутуна чырмалыр.
- Ач уят къоймаз.
- Джукъу тёшек сайламайды.
- Тешигини къатында, чычхан да батыр болур.
- Билеги кючлю, бирни джыгъар, билими кючлю, мингни джыгъар.
- Къарнынг тойгъунчу аша да, белинг талгъынчы ишле.
- Садакъачыны джаны – къапчыгъында.
Parse error: syntax error in /var/www/fastuser/data/www/elbrusoid.org/bitrix/templates/v2/components/bitrix/forum/elbrusoid/bitrix/forum.user.post/.default/template.php on line 72