- Эл ауузу – элия.
- Байны оноуу, джарлыгъа джарамаз.
- Баланы адам этген анады.
- Ишлерге уял да, ашаргъа табма.
- Минг тенг да азды, бир джау да кёбдю.
- Киштикге къанат битсе, чыпчыкъ къалмаз эди.
- Узун джолну барсанг, бюгюн келирсе, къысха джолну барсанг, тамбла келирсе.
- Нафысынгы айтханын этме, намысынгы айтханын эт.
- Суу ичген шауданынга тюкюрме.
- Ушамагъан – джукъмаз.
- Эринчекни эр алмаз, эр алса да, кёл салмаз, кёл салса да, кёб бармаз!
- Терек ауса, отунчу – кёб.
- Ариу сёз – къылычдан джити.
- Ауузу аманнга «иги», деме.
- «Ма», - дегенни билмесенг, «бер», - дегенни билмезсе.
- Окъуусуз билим – джокъ, билимсиз кюнюнг – джокъ.
- Ауругъаннга – кийик саулукъ, джетген къызгъа – чилле джаулукъ.
- Адеби болмагъан къыз – тузсуз хант.
- Ёгюзню мюйюзюнден тутадыла, адамны сёзюнден тутадыла.
- Иги джашны ышаны – аз сёлешиб, кёб тынгылар.
- Тил – миллетни джаны.
- Тюкюрюк баш джармаз, налат кёз чыгъармаз!
- Къралынгы – душмандан, башынгы от бла суудан сакъла.
- Ёксюзню тилеги къабыл болур.
- Байны къызы баймакъ болса да, юйде къалмаз!
- Ёзденликни джайгъан – джокълукъ.
- Чарсда алчыны эл кёреди.
- Баш болса, бёрк табылыр.
- Къар – келтирди, суу – элтди.
- Адамгъа аман кюн соруб келмейди.
- Тили узунну, намысы – къысха.
- Иги – алгъыш этер, аман – къаргъыш этер.
- Къызбайны юйюне дери сюрсенг, батыр болур.
- Чомартха Тейри да борчлуду.
- Татлы тилде – сёз ариу, чемер къолда – иш ариу.
- Акъылсызны джууукъгъа алма, акъыллыны кенгнге салма.
- Айранын берсенг, челегин да къызгъанма.
- Бозаны арты дауур болур.
- Этни бети бла шорпасы.
- Чакъырылмай келген къонакъ сыйланмай кетер.
- Билим насыб берир, билим джолну керир.
- Хансыз джомакъ болмаз.
- Чакъырылгъанны аты, чакъырылмагъанны багъасы болур.
- Джюрекден джюрекге джол барды.
- Къонакъ хазыр болгъанлыкъгъа, къонакъбай хазыр тюлдю.
- Джарлыны эшигин махтагъан джабар.
- Аман хансны – урлугъу кёб.
- Окъугъан озар, окъумагъан тозар.
- Къайгъы тюбю – тенгиз.
- Къыйынлы джети элни къайгъысын этер.
Профиль
|
|
|||