Джырчы ёлсе, джыры къалыр.
Чыбыкълыкъда бюгюлмеген, къазыкълыкъда бюгюлмей эди.
Башда акъыл болмаса, эки аякъгъа кюч джетер.
Джаханимни кёрмей, джандетге кёл салмазса.
Къатын байлыкъны сюер, эр саулукъну сюер.
Тенгни тенглиги джашай барсанг билинир.
Тюкюрюк баш джармаз, налат кёз чыгъармаз!
Ёгюзню мюйюзюнден тутадыла, адамны сёзюнден тутадыла.
Махтаннган къыз, тойда джукълар.
Суу ичген шауданынга тюкюрме.
Арыгъан къош чамчы болур.
Айтылгъан буйрукъ, сёгюлмез
Игилик игилик бла сингдирилиучю затды.
Джукъу тёшек сайламайды.
Биреуню къыйынлыгъы бла кесинге джол ишлеме.
Окъугъанны бети джарыкъ.
Юреннген ауруу къалмаз.
Ургъан суудан башынгы сакъла.
Къайтырыкъ эшигинги, къаты уруб чыкъма.
Ишленмеклик адамлыкъды.
Ашда уялгъан – мухар, ишде уялгъан – хомух.
Магъанасыз сёз – тауушсуз сыбызгъы.
Сабий кёргенин унутмаз.
Ким бла джюрюсенг, аны кёзю бла кёрюнюрсе.
Намысы джокъну – дуниясы джокъ.
Эри аманны, къатыны – аман.
Бичгенде ашыкъма, тикгенде ашыкъ.
Джол бла сёзню къыйыры джокъ.
Джюз элде джюз ёгюзюм болгъандан эсе, джюз джууугъум болсун.
Келлик заман – къартлыкъ келтирир, кетген заман – джашлыкъ ёлтюрюр.
Къан бла кирген, джан бла чыгъар.
Къарнынг ауруса, ауузунгу тый
Ёзденликни джайгъан – джокълукъ.
Джарлы джети элни сёзюн этер.
Ишге юренсин къоллары, халкъ бла болсун джоллары.
Тёрдеги кюлсе, эшикдеги ышарыр.
Тил – кесген бычакъ, сёз – атылгъан окъ.
Ёпкелегенни ашы татлы болады.
Башынга джетмегенни сорма.
Джюрекден джюрекге джол барды.
Келинин тута билмеген, къул этер, къызын тута билмеген, тул этер.
Кимни – тили, тиши онглу, кимни – къолу, иши онглу.
Аманны тукъумуна къарама, игини тукъумун сорма.
Тешик этген тынчды, аны джамагъан къыйынды.
Аманнга да, игиге да оноусуз къатышма.
Ётюрюкню башын керти кесер.
Хар сёзню орну барды.
Ётген ёмюр – акъгъан суу.
Уллу къашыкъ эрин джыртар.
Абынмазлыкъ аякъ джокъ, джангылмазлыкъ джаякъ джокъ.
