- Джылкъыдан – ат чыгъар, тукъумдан – джаш чыгъар.
- Тюзню ётмеги тюзде къалса да, тас болмаз.
- Уллу атлама – абынырса, уллу къабма – къарылырса.
- Къалгъан ишге къар джауар.
- Экеулен сёлеше тура эселе, орталарына барыб кирме.
- Чомарт джарлы болмаз.
- Аман адам элни бир-бирине джау этер.
- Аман къатын сабий табса, бий болур…
- Эл ауузу – элек, анга ийнаннган – халек.
- Намыс болмагъан джерде, насыб болмаз.
- Къарт бла баш аша, джаш бла аякъ аша.
- Акъыллы айтыр эди, акъылсыз къоймайды.
- Тойгъан джерден туугъан джер игиди.
- Соргъан айыб тюлдю, билмеген айыбды.
- Элде адам къалмаса, ит тахтагъа минер.
- Окъумагъан сокъурду, сокъур ташха абыныр!
- Тешик этген тынчды, аны джамагъан къыйынды.
- Ач отунчуну ачыуу – бурнунда.
- Тай асырагъан, атха минер.
- Аман къатын алгъан, арыр, иги къатын алгъан джарыр.
- Джолда аягъынга сакъ бол, ушакъда тилинге сакъ бол.
- Ауругъаннга – кийик саулукъ, джетген къызгъа – чилле джаулукъ.
- Бермеген къол, алмайды.
- Билген билмегенни юретген адетди.
- Аман адам этегингден тутса, кес да къач.
- Къызбайны юйюне дери сюрсенг, батыр болур.
- Тил бла келеди джыр да.
- Хунаны тюбюн къазсанг, юсюнге ауар.
- Атадан ёксюз – бир ёксюз, анадан ёксюз – эки ёксюз.
- Тамбла алтындан бюгюн багъыр ашхы.
- Экеу тутушса, биреу джыгъылыр.
- Экиндини кеч къылсанг, чабыб джетер ашхам.
- Чомартха хар кюн да байрамды.
- Къарнынг ауруса, ауузунгу тый
- Хар сёзню орну барды.
- Сабий кёргенин унутмаз.
- Джашлыкъ этмеген, башлыкъ этмез.
- Арпа, будай – ащды, алтын, кюмюш а – ташды.
- Акъдан къара болмаз.
- Этим кетсе да, сюегим къалыр.
- Эл элде бирер малынг болгъандан эсе, бирер тенгинг болсун.
- Джахил болса анасы, не билликди баласы?
- Рысхы – сют юсюнде кёмюк кибикди.
- Аш берме да, къаш бер.
- Ёмюрлюк шохлукъну джел элтмез.
- Этни бети бла шорпасы.
- Чоюнну башы ачыкъ болса, итге уят керекди.
- Мал тутхан – май джалар.
- Къая джолда джортма, ачыкъ сёзден къоркъма.
- Илму – джашауну джолу.
КАК СКАЧАТЬ МУЗЫКУ?
Читают тему (гостей: 1)