Аман киши кеси юйюнде – къонакъ.
Къатын къылыкъсыз, эр тынчлыкъсыз.
Рысхы – сют юсюнде кёмюк кибикди.
Биреу ашаб къутулур, биреу джалаб тутулур.
Бойнуму джети джерден кессенг да, мен ол ишни этеллик тюлме.
Босагъагъа джууукъ орун болса, ашыгъыб тёрге озма.
Байдан умут эте, джарлыдан ёгюз багъасы къорады.
Хар зат кесини орнуна иги.
Дженгил джетерикме деб, узун джолну къоюб, къысхасын барма.
Тик ёргени, тик энгишгеси да болады.
Сабыр джетер муратха, сабырсыз къалыр уятха.
Ашхы – джыяр, аман – джояр.
Иесиз малны бёрю ашар.
Накъырданы арты керти болур.
Чомартны къолу берекет.
Юреннген ауруу къалмаз.
Джюрек кёзден алгъа кёрюр.
Уллу айтханны этмеген – уллаймаз.
Джыгъылгъанны сырты джерден тоймаз.
Къатын байлыкъны сюер, эр саулукъну сюер.
Чабар ат – джетген къыз.
Зарда марда джокъ.
Терек ауса, отунчу – кёб.
Тамчы таш тешер.
Ишлемеген – тишлемез.
Айырылгъанланы айю ашар, бёлюннгенлени бёрю ашар.
Ёмюрлюк шохлукъну джел элтмез.
Къошда джокъгъа – юлюш джокъ.
Аджалсыз ёлюм болмаз.
Ана – юйню кюн джарыгъы.
Термилгенинги табмазса, кюлгенинге тюберсе.
Юйюнг бла джау болгъандан эсе, элинг бла джау бол.
Кечеси – аяз, кюню – къыш, джарлы къаргъагъа бир аш тюш!
Айранын берсенг, челегин да къызгъанма.
Бир абыннган – минг сюрюнюр.
Эшекни не къадар тюйсенг да, ат болмаз.
Эл ауузу – элия.
Къыз келсе, джумуш эте келеди, къатын келсе, ушакъ эте келеди.
Дуния мал дунияда къалады.
Мал ёлсе, сюек къалыр, адам ёлсе, иши къалыр.
Къазанчы аман болса, къазаны къайнамаз.
Тулпарлыкъ, билекден тюл – джюрекден.
Ёлген аслан – сау чычхан.
Къартны бурнун сюрт да, оноугъа тут.
Эллинг бла джау болсанг да, юйюнг бла джау болма.
Рысхысына кёре, джаш ёсер, къышлыгъына кёре, мал ёсер.
Кёб ашасанг, татыуу чыкъмаз, кёб сёлешсенг, магъанасы чыкъмаз.
Джаралыны джастыгъында сау ёлюр.
Къонагъы джокъну – шоху джокъ.
Адам къыйынлыгъын кёлтюрюр, зауукълугъун кёлтюрмез.
.