- Дуния малгъа сатылма, кесингден телиге къатылма.
- Ётген ёмюр – акъгъан суу.
- Айыбны суу бла джууалмазса.
- Хазыр ашха – терен къашыкъ.
- Джогъун бар этген, барын бал этген.
- Къарын къуру болса, джюрек уру болур.
- Сибиртки да сыйлы болду, кюрек да кюнлю болду.
- Мураты болгъанны джюрек тебюую башхады.
- Къартха ушагъан джаш – акъыллы, джашха ушагъан къарт – тели.
- Бир абыннган – минг сюрюнюр.
- Билим – акъылны чырагъы.
- Ач келгенни – тойдур, кеч келгенни – къондур.
- Аджалсыз ёлюм болмаз.
- Бичгенде ашыкъма, тикгенде ашыкъ.
- Ханы къызы буюгъа-буюгъа киштик болду.
- Эркиши – от, тиширыу – суу.
- Кюл тюбюндеги от кёрюнмейди.
- Къазанда болса, чолпугъа чыгъар.
- Ат да турмайды бир териде.
- Ишленмеген джаш – джюгенсиз ат, ишленмеген къыз – тузсуз хант.
- Хансыз джомакъ болмаз.
- Тынгылагъан тынгы бузар.
- Сакъалы текени да бар, мыйыгъы киштикни да бар.
- Кютгени беш эчки, сызгъыргъаны уа, джерни джарады.
- Сакъ юйюне сау барыр.
- Тойчу джашха къарама, къойчу джашха къара.
- Акъыл къартда, джашда тюйюлдю – башдады.
- Татлы тилде – сёз ариу, чемер къолда – иш ариу.
- Хар сёзню орну барды.
- Джетген къыз джерли эшекни танымаз.
- Къуру гыбыт бек дыгъырдар.
- Айныгъанлы алты кюн, тогъайгъанлы тогъуз кюн.
- Кёкдеги болмаса, джердегин кёрмейди.
- Бек анасы джыламаз.
- Эки итни арасына сюек атма, эки адамны арасында сёз чыгъарма.
- Атынг аманнга чыкъгъандан эсе, джанынг тамагъынгдан чыкъсын.
- Ачны эсинде – аш.
- Кирсизни – саны таза, халалны – къаны таза.
- Байлыкъдан саулукъ ашхыды.
- Кёб ант этген, кёб ётюрюк айтыр.
- Джарлы тюеге минсе да, ит къабар.
- Сакъламагъан затынга джолукъсанг, не бек къууанаса, не бек ачыйса.
- Эки къатын алгъанны къулагъы тынгнгаймаз.
- Уясында не кёрсе, учханында аны этер.
- Мадар болса, къадар болур.
- Таш ата билмеген, башына урур.
- Сёз къанатсыз учар.
- Аманны къуугъан, аманлыкъ табар.
- Бал ашаргъа сюе эсенг, чибин ургъаннга тёз.
- Айранны сюйген, ийнек тутар.
Хиджра
Читают тему (гостей: 1)