Войти на сайт
29 Марта  2024 года

 

  • Ётюрюк хапар аякъ тюбю бла джюрюйдю.
  • Джаралыны джастыгъында сау ёлюр.
  • Тулпарлыкъ, билекден тюл – джюрекден.
  • Тилде сюек болмаса да, сюек сындырыр.
  • Башда акъыл болмаса, эки аякъгъа кюч джетер.
  • Ашхы атаны – джашы ашхы, ашхы ананы – къызы ашхы.
  • Тойгъа барсанг, тоюб бар, эски тонунгу къоюб бар.
  • Ёлген аслан – сау чычхан.
  • Биреуню эскиси биреуге джангы болмайды.
  • Адам къыйынлыгъын кёлтюрюр, зауукълугъун кёлтюрмез.
  • Кюн кёрмеген, кюн кёрсе, кюндюз чыракъ джандырыр.
  • Кёзню ачылгъаны – иги, ауузну джабылгъаны – иги.
  • Къарт айтханны этмеген, къартаймаз.
  • Адам бла мюлк юлешмеген эсенг, ол адамны билиб бошагъанма, деб кесинги алдама.
  • Кечеси – аяз, кюню – къыш, джарлы къаргъагъа бир аш тюш!
  • Ата – баланы уясы.
  • Къан бла кирген, джан бла чыгъар.
  • Ушамагъан – джукъмаз.
  • Экиндини кеч къылсанг, чабыб джетер ашхам.
  • Билген билмегенни юретген адетди.
  • Сибиртки да сыйлы болду, кюрек да кюнлю болду.
  • Тойгъан джерден туугъан джер игиди.
  • Нарт сёз къарт болмаз.
  • Кийимни бичсенг, кенг бич, тар этген къыйын тюлдю.
  • Бетинги сатма, малынгы сат.
  • Къайтырыкъ эшигинги, къаты уруб чыкъма.
  • Башынга джетмегенни сорма.
  • Тамбла алтындан бюгюн багъыр ашхы.
  • Билгенни къолу къарны джандырыр.
  • От кюйдюрген, сау болса да, тот кюйдюрген, сау болмаз.
  • От этилмеген джерден тютюн чыкъмайды.
  • Къонагъы джокъну – шоху джокъ.
  • Ашарыкъда сайлагъаннга – чий гырджын.
  • Къайгъы тюбю – тенгиз.
  • Миллетни бойну – базыкъ, аны бла кюрешген – джазыкъ.
  • Ёгюзню мюйюзлери ауурлукъ этмейдиле.
  • Кесине оноу эте билмеген, халкъына да эте билмез.
  • Джолунга кёре – джюрюшюнг, джагъанга кёре – юлюшюнг.
  • Кёлю джокъну – джолу джокъ.
  • Арба аугъандан сора, джол кёргюзтюучю кёб болур.
  • Кёлсюзден сёзсюз тууар.
  • Билим ат болуб да чабар, къуш болуб да учар.
  • Ауузу бла къуш тута айланады.
  • Сакъалы текени да бар, мыйыгъы киштикни да бар.
  • Иесиз малны бёрю ашар.
  • Джети тилни билген джети кишиди.
  • Къыз чыгъаргъан – къызыл къымжа.
  • Накъырданы арты керти болур.
  • Кюлме джашха – келир башха.
  • Къолу уллу – асыу, аягъы уллу – джарсыу.

 

Страницы: 1
RSS
Каппушланы Яхья эфенди
 
Джаш тёлюге осият

Ёмюрюм озду къалды,
Гюнах юсюмде джокълаб,
Ёлюм келечи келди,
Джюрек тургьанлай джукълаб.

Ол келечиден мурат
Болады башда акьлыкь,
Аны бла биргелей
Бизге келеди къартлыкъ.

Ёлмесенг да къарт болмаз- мыса,
дегенле нартла,
Бу сёзню айтыучан элле
Бизни мубарек кьартла.

Акълыкъ бйзге келгенди,
Биз джукъ билмей тургьанлай,
Къартлыкъны келмеклигин
Билдик, акъ тюк ургьанлай.

Ёлмесегиз, балала,
Сиз да болурсуз бизлей,
Джашлыкъ сизден тайышыб,
Къалырсыз кюсеб излей.
 
Энди джаш ёмюрлени
Юйюнде бошамагьыз
Джахил къалыб, дунияда
Хайуаннга ушамагъыз.

Не мазаллы болсанг да,
Джахил къалсанг, не файда,
Хайуан кибик джегилиб,
Сен джюрюрсе хар къайда.

Дунияда сыйлылыкъны
Сюйсенг, гьилму окьурса,
Ахратда да билимсиз
Болсанг, ийнан, сокъурса.

Тагъылмагъыз билимсиз,
Къылыкъсыз балалагьа,
Ала бла джюрюсегиз
Ушарсыз сиз алагьа.

Ичгичилик, зийналыкъ
Болсунла сизден узакъ,
Халкьны къыйнамакьлыкъдан
Бек къоркъуб, болугьуз сакъ.
 
Халкъгьа кесин сюйдюрмек
Бек багьалыд, билигиз,
Ариу кьылыкълы болуб,
Татлы болсун тилигиз.

Муслиманла сюйгенни
Бир Аллаh да сюйеди,
Ала шагъат болгьанны
Джаннетине ийеди.

Гьилмугьузгъа тюз акъыл
Керти нёгер болмаса,
Сабырлыкъ дабигьат* да
Юсюгюзде толмаса.

Не кёб окьусагьыз да
Сиз насыблы болмазсыз,
Ариу кьылыкълы болмай,
Дагъыда сиз онгмазсыз.
 
Сиз туракълаб турмагьыз
Сизге келлик акълыкъгьа,
Болджал салмай къайтыгьыз
Бу биз айтхан хакълыкъгьа.

Эй, балала, салмагьыз,
Иги ишни болджалгьа,
Сиз ашыгьыб этигиз
Иги ишни эм алгьа.


Нек десенг, ёлюм келед,
Уллу-гитче айырмай,
Болджал джетгенни, джыгьад
Не азчыкъ да къайгьырмай.

Эм алгьын бир Aллаhха
Керти иман салыгъыз,
Исламны, исханны да,
Къабыл этиб алыгьыз.

Махтау бары Аллаhхад
Бизни адамдан туудургъан,
Гъилму, акъыл билим бериб,
Кирибизни джуудургъан.
 
Салат саламла да болсун
Мухаммад расулуна,
Аллаhхдан рахмат джаусун
Анга ийнаннган къулуна.

Расулуллаh буйурду
Биз тафаккур* этерге,
Алтмыш джыл гъибадатны*
Сууабына джетерге.



Кёкге джерге къарасам,
Хайран болуб къалама,
Уллу Аллаhха буйугьуб,
Керти иман салама.

Кёкню джерни юсюнде
Ненча сейирликле бар,
Аллаhлыгьын танытыр
Ючюн джаратхан джаббар*
 
Биз юсюнде джашагьан
Джер биринчи далилди*,
Аны, ишлеб, хауада
Тутхан Аллаh джалилди*.

Тёртден ючюсю тенгиз
Бу ауур тёгерек джер,
Аллah аны тутмаса,
Ким тутаред, джууаб бер.

Багьана джокъ, аркъау джокъ,
Джукъну юсюнде турмайды,
Авариясы болуб,
Кесин джукъгьа урмайды.

Энтда аны кючюнде
Турлукъду ма бу джери,
Орнундан тайышмайын,
Къыямат кюннге дери.
 
Биз керген бу фалакла*,
Ол тыймайын, оюлса
Ким тыйаред аланы,
Баш энишге къуйулса.

Не гитче зат тохтамайд,
Бош хауада тыйылыб,
Бир тыйыучу болмаса
Ез орнуна джыйылыб.

Хар бир фалак турады
Маканындан* кетмейин,
Кете барыб хауада,
Бир-бирине джетмейин.

Барына чыракъ болуб,
Кюн да турад джарытыб,
Хар бир затны кёгюзюб,
Джанлылагьа танытыб.
 
Аны джарыгьы бла
Хар ким ишине кетед,
Ол батхынчы дунияда
Хар джан джашаун этед.

Ол батханлай къалабыз
Къаб-кьарангыгьа кириб,
Хар джан уясын табад
Тынчаир джерин билиб.

Ол кюнню джюрюуюнде
Кече, Кюндюз да болад
Ол экиси хар заман
Джыйырма тёрт сагьат толад.

Ол Аллаhны сагьатыд,
Уакъдыланы танытхан, ,
Аны бла биргелей
Фалакланы джарытхан.
 
къалгъан кесегин бир кесек черикер салырма , разы болугъуз
Страницы: 1
Читают тему (гостей: 1)

 

Написать нам