Войти на сайт
28 Марта  2024 года

 

  • Ата Джуртун танымагъан, атасын да танымаз.
  • Билеги кючлю, бирни джыгъар, билими кючлю, мингни джыгъар.
  • Сёлеш деб шай берген, тохта деб, сом берген.
  • Ат да турмайды бир териде.
  • Чомартха Тейри да борчлуду.
  • Малны кют, джерни тюрт.
  • Аманны эки битли тону болур, бирин сеннге кийдирир, бирин кеси киер.
  • Эки къатын алгъанны къулагъы тынгнгаймаз.
  • Кёбден умут этиб, аздан къуру къалма.
  • Къартны бурнун сюрт да, оноугъа тут.
  • Ачыкъ джюрекге джол – ачыкъ.
  • Игини сыйлагъан адетди.
  • Кирсизни – саны таза, халалны – къаны таза.
  • Къулакъдан эсе, кёзге ышан.
  • Аман адам элни бир-бирине джау этер.
  • Эрни эр этерик да, къара джер этерик да, тиширыуду.
  • Элни кючю – эмеген.
  • Бастасын ашагъан, хантусун да ичер.
  • Ишленмеклик адамлыкъды.
  • Арбаз къынгырды да, ийнек сауалмайма.
  • Айран тёгюлсе, джугъусу къалыр.
  • Аууздан келген, къолдан келсе, ким да патчах болур эди.
  • Ханы къызы буюгъа-буюгъа киштик болду.
  • Къолунгдан къуймакъ ашатсанг да, атаны борчундан къутулмазса.
  • Дууулдаса – бал чибин, къонса – къара чибин.
  • Экеу тутушса, биреу джыгъылыр.
  • Билмегенинги, билгеннге сор.
  • Намыс болмагъан джерде, насыб болмаз.
  • Бек анасы джыламаз.
  • Тилчи бир сагъатха айлыкъ хата этер.
  • Этни бети бла шорпасы.
  • Таукелге нюр джауар.
  • Тойчу джашха къарама, къойчу джашха къара.
  • Аллахдан тилесенг, кёб тиле.
  • Ойнай билмеген, оюн бузар.
  • Кёб джашагъан – кёб билир.
  • Эл ауузу – элия.
  • Джыланны къуйругъундан басарынг келсе, аны башы болгъанын унутма.
  • Насыблы элин сюер, насыбсыз кесин сюер.
  • Эркишини аманы тиширыуну джылатыр.
  • Тилчиден кери бол.
  • Татлы тилде – сёз ариу, чемер къолда – иш ариу.
  • Кесинге джетмегенни, кёб сёлешме.
  • Тойгъа алгъа да барма, тойда артха да къалма.
  • Джарлы эскисин джамаса, къууаныр.
  • Сютден ауузу кюйген, суугъа юфгюре эди.
  • Кёлю джокъну – джолу джокъ.
  • Ашарыкъда сайлагъаннга – чий гырджын.
  • Тойгъан джерге джети къайт.
  • Таула не мийик болсала да, аууш табылыр.

 

Страницы: 1
RSS
Каппушланы Яхья эфенди
 
Джаш тёлюге осият

Ёмюрюм озду къалды,
Гюнах юсюмде джокълаб,
Ёлюм келечи келди,
Джюрек тургьанлай джукълаб.

Ол келечиден мурат
Болады башда акьлыкь,
Аны бла биргелей
Бизге келеди къартлыкъ.

Ёлмесенг да къарт болмаз- мыса,
дегенле нартла,
Бу сёзню айтыучан элле
Бизни мубарек кьартла.

Акълыкъ бйзге келгенди,
Биз джукъ билмей тургьанлай,
Къартлыкъны келмеклигин
Билдик, акъ тюк ургьанлай.

Ёлмесегиз, балала,
Сиз да болурсуз бизлей,
Джашлыкъ сизден тайышыб,
Къалырсыз кюсеб излей.
 
Энди джаш ёмюрлени
Юйюнде бошамагьыз
Джахил къалыб, дунияда
Хайуаннга ушамагъыз.

Не мазаллы болсанг да,
Джахил къалсанг, не файда,
Хайуан кибик джегилиб,
Сен джюрюрсе хар къайда.

Дунияда сыйлылыкъны
Сюйсенг, гьилму окьурса,
Ахратда да билимсиз
Болсанг, ийнан, сокъурса.

Тагъылмагъыз билимсиз,
Къылыкъсыз балалагьа,
Ала бла джюрюсегиз
Ушарсыз сиз алагьа.

Ичгичилик, зийналыкъ
Болсунла сизден узакъ,
Халкьны къыйнамакьлыкъдан
Бек къоркъуб, болугьуз сакъ.
 
Халкъгьа кесин сюйдюрмек
Бек багьалыд, билигиз,
Ариу кьылыкълы болуб,
Татлы болсун тилигиз.

Муслиманла сюйгенни
Бир Аллаh да сюйеди,
Ала шагъат болгьанны
Джаннетине ийеди.

Гьилмугьузгъа тюз акъыл
Керти нёгер болмаса,
Сабырлыкъ дабигьат* да
Юсюгюзде толмаса.

Не кёб окьусагьыз да
Сиз насыблы болмазсыз,
Ариу кьылыкълы болмай,
Дагъыда сиз онгмазсыз.
 
Сиз туракълаб турмагьыз
Сизге келлик акълыкъгьа,
Болджал салмай къайтыгьыз
Бу биз айтхан хакълыкъгьа.

Эй, балала, салмагьыз,
Иги ишни болджалгьа,
Сиз ашыгьыб этигиз
Иги ишни эм алгьа.


Нек десенг, ёлюм келед,
Уллу-гитче айырмай,
Болджал джетгенни, джыгьад
Не азчыкъ да къайгьырмай.

Эм алгьын бир Aллаhха
Керти иман салыгъыз,
Исламны, исханны да,
Къабыл этиб алыгьыз.

Махтау бары Аллаhхад
Бизни адамдан туудургъан,
Гъилму, акъыл билим бериб,
Кирибизни джуудургъан.
 
Салат саламла да болсун
Мухаммад расулуна,
Аллаhхдан рахмат джаусун
Анга ийнаннган къулуна.

Расулуллаh буйурду
Биз тафаккур* этерге,
Алтмыш джыл гъибадатны*
Сууабына джетерге.



Кёкге джерге къарасам,
Хайран болуб къалама,
Уллу Аллаhха буйугьуб,
Керти иман салама.

Кёкню джерни юсюнде
Ненча сейирликле бар,
Аллаhлыгьын танытыр
Ючюн джаратхан джаббар*
 
Биз юсюнде джашагьан
Джер биринчи далилди*,
Аны, ишлеб, хауада
Тутхан Аллаh джалилди*.

Тёртден ючюсю тенгиз
Бу ауур тёгерек джер,
Аллah аны тутмаса,
Ким тутаред, джууаб бер.

Багьана джокъ, аркъау джокъ,
Джукъну юсюнде турмайды,
Авариясы болуб,
Кесин джукъгьа урмайды.

Энтда аны кючюнде
Турлукъду ма бу джери,
Орнундан тайышмайын,
Къыямат кюннге дери.
 
Биз керген бу фалакла*,
Ол тыймайын, оюлса
Ким тыйаред аланы,
Баш энишге къуйулса.

Не гитче зат тохтамайд,
Бош хауада тыйылыб,
Бир тыйыучу болмаса
Ез орнуна джыйылыб.

Хар бир фалак турады
Маканындан* кетмейин,
Кете барыб хауада,
Бир-бирине джетмейин.

Барына чыракъ болуб,
Кюн да турад джарытыб,
Хар бир затны кёгюзюб,
Джанлылагьа танытыб.
 
Аны джарыгьы бла
Хар ким ишине кетед,
Ол батхынчы дунияда
Хар джан джашаун этед.

Ол батханлай къалабыз
Къаб-кьарангыгьа кириб,
Хар джан уясын табад
Тынчаир джерин билиб.

Ол кюнню джюрюуюнде
Кече, Кюндюз да болад
Ол экиси хар заман
Джыйырма тёрт сагьат толад.

Ол Аллаhны сагьатыд,
Уакъдыланы танытхан, ,
Аны бла биргелей
Фалакланы джарытхан.
 
къалгъан кесегин бир кесек черикер салырма , разы болугъуз
Страницы: 1
Читают тему (гостей: 1)

 

Написать нам