Рысхы джалгъанды: келген да этер, кетген да этер.
Джол бла сёзню къыйыры джокъ.
Къоркъакъны кёзю экили кёрюр.
Огъурлуну сёзю – суу, огъурсузну сёзю – уу.
Ётюрюкню башын керти кесер.
Гитче джилтин уллу элни джандырыр.
Айныгъанлы алты кюн, тогъайгъанлы тогъуз кюн.
Эл ауузу – элек, анга ийнаннган – халек.
Адам къаллай бир ишленмесе, аллай бир кесин уллу кёреди.
Келлик заман – къартлыкъ келтирир, кетген заман – джашлыкъ ёлтюрюр.
Хантына кёре тузу, юйюне кёре къызы.
Окъ къызбайны джокълайды.
Эртде тургъан джылкъычыны эркек аты тай табар.
Эринчекге кюн узун.
Сёз садакъдан кючлюдю.
Эки элинги тыйсанг, джети элде махталырса.
Тенги кёбню джау алмаз, акъылы кёбню дау алмаз.
Билимден уллу байлыкъ джокъду.
Байдан умут эте, джарлыдан ёгюз багъасы къорады.
Тили узунну, намысы – къысха.
Арбаз сайлама да, хоншу сайла.
Чарсда алчыны эл кёреди.
Суу кетер, таш къалыр.
Къарт болгъан джерде, берекет болур, сабий болгъан джерде, оюн болур.
Адеб этмеген, адеб кёрмез.
Битмегеннге сакъал – танг.
Тойгъан джерге джети къайт.
Джырчы ёлсе, джыры къалыр.
Къолу уллу – асыу, аягъы уллу – джарсыу.
Алма терегинден кери кетмез.
Биреуге аманлыкъ этиб, кесинге игилик табмазса.
Ана къойну – балагъа джандет.
Эки къатын алгъанны къулагъы тынгнгаймаз.
Иги сеники эсе да, сюйген кесимикин этеме.
Джаш къарыу бла кючлю, къарт акъыл бла кючлю.
Джангыз терек къынгыр ёсер.
Джуртун къоругъан озар.
Бермеген къол, алмайды.
Башы джабылгъан челекге, кир тюшмез.
Ариу сёзде ауруу джокъ.
Магъанасыз сёз – тауушсуз сыбызгъы.
Джаз бир кюнню джатсанг, къыш талай кюнню абынырса.
Акъыл аздырмаз, билим тоздурмаз.
Кюл тюбюндеги от кёрюнмейди.
Тешик этген тынчды, аны джамагъан къыйынды.
Алтыннга тот къонмаз.
Азыкъ аз болса, эртде орун сал.
Адеб джокъда, намыс джокъ.
Ашлыкъны арба юйге келтирир, чана базаргъа элтир.
Къарнынг тойгъунчу аша да, белинг талгъынчы ишле.
![http://img341.imageshack.us/img341/3384/22316923ou 2.jpg]](http://img341.imageshack.us/img341/3384/22316923ou2.jpg "http://img341.imageshack.us/img341/3384/22316923ou 2.jpg]")
