Окъдан джара эртде-кеч болса да бителир, сёз джара, ёмюрге къалыр.
Насыблыны баласы кюн кюнден да баш болур, насыбсызны баласы, кюн кюнден да джаш болур.
Асхат ашлыкъ сата, юйдегиси ачдан къата.
Хунаны тюбюн къазсанг, юсюнге ауар.
Джигер – джаннга къыйынлыкъ.
Таукел къуру къалмаз.
Эшекге миннген – биринчи айыб, андан джыгъылгъан – экинчи айыб.
Къарын къуру болса, джюрек уру болур.
Сабийликде юретмесенг, уллу болса – тюзелмез.
Мени джылытмагъан кюн, меннге тиймесин!
Тёрдеги кюлсе, эшикдеги ышарыр.
Чёбню кёлтюрсенг, тюбюнден сёз чыгъар.
Мал кёб болса, джууукъ кёб болур.
Айранны сюйген, ийнек тутар.
Билим ат болуб да чабар, къуш болуб да учар.
Баргъанынга кёре болур келгенинг.
Нёгер болсанг, тенг бол, тенг болмасанг, кенг бол.
Татлы сёз – балдан татлы.
Эрине къаргъыш этген къатын, эрнин къабар.
Къыз тиширыу кеси юйюнде да къонакъды.
Кёбден умут этиб, аздан къуру къалма.
Сабийни джумушха джибер да, ызындан бар.
Эртде тургъан джылкъычыны эркек аты тай табар.
Айтылгъан буйрукъ, сёгюлмез
Ётюрюкню къуйругъу – бир тутум.
Чомартны къолун джокълукъ байлар.
Алим болгъандан эсе, адам болгъан къыйынды.
Этек чакъмакълары баш джаргъан, сёлешген сёзлери таш джаргъан.
Адебни адебсизден юрен.
Рысхы джалгъанды: келген да этер, кетген да этер.
Байлыкъ тауусулур, билим тауусулмаз.
Орну джокъну – сыйы джокъ.
Байны къызы баймакъ болса да, юйде къалмаз!
Тойгъан джерге джети къайт.
Ариу сёз – джаннга азыкъ, аман сёз – башха къазыкъ.
Иги бла джюрюсенг, джетерсе муратынга, аман бла джюрюсенг, къалырса уятха.
Юреннген ауруу къалмаз.
Халкъгъа джарагъан, джарлы къалмаз.
Къарнынг къанлынга кийирир.
Кёл – къызбай, къол – батыр.
Эллинг бла джау болсанг да, юйюнг бла джау болма.
Элиб деген, элге болушур.
Тили узунну, намысы – къысха.
Ач отунчуну ачыуу – бурнунда.
Дженгил джетерикме деб, узун джолну къоюб, къысхасын барма.
Махтаннган къыз, тойда джукълар.
Бозанг болмагъан джерге, къалагъынгы сукъма.
Къонагъынгы артмагъын алма да, алгъышын ал.
Джырчы джырчыгъа – къарнаш.
Тёзген – тёш ашар!
![http://img341.imageshack.us/img341/3384/22316923ou 2.jpg]](http://img341.imageshack.us/img341/3384/22316923ou2.jpg "http://img341.imageshack.us/img341/3384/22316923ou 2.jpg]")
