- Миллетни бойну – базыкъ, аны бла кюрешген – джазыкъ.
- Ариу сёзде ауруу джокъ.
- Джумушакъ терекни къурт ашар.
- Абынмазлыкъ аякъ джокъ, джангылмазлыкъ джаякъ джокъ.
- Джырчы джырчыгъа – къарнаш.
- Биреуню эскиси биреуге джангы болмайды.
- Итли къонакъ джарашмаз.
- Аш кетер да бет къалыр.
- Билгенни къолу къарны джандырыр.
- Зар адам ашынгы ашар, кесинги сатар.
- Юйюнг бла джау болгъандан эсе, элинг бла джау бол.
- Тилчи бир сагъатха айлыкъ хата этер.
- Аллахха ийнаннган кишини, Аллах онгдурур ишин.
- Джаз бир кюнню джатсанг, къыш талай кюнню абынырса.
- Игини сыйлагъан адетди.
- Асхат ашлыкъ сата, юйдегиси ачдан къата.
- Дуния аламаты сен эсенг да, игиме деб айтма.
- Аууз сакълагъан – джан сакълар.
- Чалманны аллы къалай башланса, арты да алай барады.
- Къарт бла баш аша, джаш бла аякъ аша.
- Къыз келсе, джумуш эте келеди, къатын келсе, ушакъ эте келеди.
- Адам боллукъ, атламындан белгили болур.
- Экеулен сёлеше тура эселе, орталарына барыб кирме.
- Аз сёлешген, къайгъысыз турур.
- Ачлыкъ отха секиртир.
- Байлыкъ адамны сокъур этер.
- Тойчу джашха къарама, къойчу джашха къара.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Ишлемеген – тишлемез.
- Джюз элде джюз ёгюзюм болгъандан эсе, джюз джууугъум болсун.
- Айраннга суу къош, телиге джол бош.
- Дуния малгъа сатылма, кесингден телиге къатылма.
- Аджашханны ызындагъы кёреди, джангылгъанны джанындагъы биледи.
- Къызбайны юйюне дери сюрсенг, батыр болур.
- Биреуге аманлыкъны тилеме да, кесинге ашхылыкъны тиле.
- Байны оноуу, джарлыгъа джарамаз.
- Айтхан – тынч, этген – къыйын.
- Башынга джетмегенни сорма.
- Джахил болса анасы, не билликди баласы?
- Ата – баланы уясы.
- Халкъны джырын джырласанг, халкъ санга эжиу этер.
- Ашхы атаны – джашы ашхы, ашхы ананы – къызы ашхы.
- Джети тилни билген джети кишиди.
- Арпа, будай – ащды, алтын, кюмюш а – ташды.
- Эки ойлашыб, бир сёлешген.
- Адамны сыфатына къарама, сёзюне къара.
- Кирсизни – саны таза, халалны – къаны таза.
- Тели турса – той бузар.
- Адамны бетине къарама, адетине къара.
- Джаш болсун, къыз болсун, акъылы, саны тюз болсун.
