Войти на сайт
28 Марта  2024 года

 

  • Къайгъыны сюйген, къайгъы табар.
  • Элни кючю – эмеген.
  • Ёлюр джаннга, ёкюл джокъ.
  • Чарсда алчыны эл кёреди.
  • Юй кюйдю да, кюйюз чыкъды, ортасындан тюйюш чыкъды.
  • Кютгени беш эчки, сызгъыргъаны уа, джерни джарады.
  • Телиге от эт десенг, юйюнге от салыр.
  • Джаз бир кюнню джатсанг, къыш талай кюнню абынырса.
  • Этим кетсе да, сюегим къалыр.
  • Тура эдим джата, къайдан чыкъды хата?
  • Ач келгенни – тойдур, кеч келгенни – къондур.
  • Шапа кёб болса, аш татымсыз болур.
  • Телини эшигин, махтау джабар.
  • Суугъа – чабакъ, къаягъа – ыргъакъ.
  • Юйлю уругъа ит чабмаз.
  • Къызгъанчдан ычхыныр, мухардан ычхынмаз.
  • Чомарт джарлы болмаз.
  • Джылыгъа джылан илешир.
  • Сормай – алма, чакъырылмай – барма.
  • Къыз тиширыу кеси юйюнде да къонакъды.
  • Ариу сёз – джаннга азыкъ, аман сёз – башха къазыкъ.
  • Чомарт къонакъ юй иесин сыйлар.
  • Тилсиз миллет джокъ болур.
  • Тёрдеги кюлсе, эшикдеги ышарыр.
  • Эки къатын алгъан – эки ташны ортасына башын салгъан.
  • Джылар джаш, атасыны сакъалы бла ойнар.
  • Кюн – узун, ёмюр – къысха.
  • Байны оноуу, джарлыгъа джарамаз.
  • Джиби бир къат джетмей эди да, эки къат тарта эди.
  • Джаш къарыу бла кючлю, къарт акъыл бла кючлю.
  • Тёзген – тёш ашар!
  • Ёлмесенг да, къарт дамы болмазса?
  • Айран ичген – къутулду, джугъусун джалагъан – тутулду.
  • Ётюрюк хапар аякъ тюбю бла джюрюйдю.
  • От кюйдюрген, сау болса да, тот кюйдюрген, сау болмаз.
  • Окъдан джара эртде-кеч болса да бителир, сёз джара, ёмюрге къалыр.
  • Акъыллы – эл иеси, тели – эл баласы.
  • Ач – эснер, ат – кишнер.
  • Тенгни тенглиги джашай барсанг билинир.
  • Этек чакъмакълары баш джаргъан, сёлешген сёзлери таш джаргъан.
  • Элиб деген, элге болушур.
  • Кесинге джетмегенни, кёб сёлешме.
  • Сютню башын джалагъан къутулур, тюбюн ичген тутулур.
  • Ашхылыкъ джерде джатмайды, аманлыкъ суугъа батмайды.
  • Айтхан – тынч, этген – къыйын.
  • Тас болгъан бычакъны сабы – алтын.
  • Адам туугъан джеринде, ит тойгъан джеринде.
  • Чыбыкълыкъда бюгюлмеген, къазыкълыкъда бюгюлмей эди.
  • Окъумагъан сокъурду, сокъур ташха абыныр!
  • Ханнга да келеди хариблик.

 

Страницы: 1 2 3 4 След.
RSS
Сабийлеге къонакъгъа, келгендиле джомакъла!!!
 
Форумда кёб темаларыбызда джазгъанла шагъатдыла, къарачай-малкъар тилибизни кёбюбюз иги билмейбиз. Ол нек болгъанды алай? Гитчелигибизден ана тилибизге уллу эс бёлмегенибиз ючюн. Ол себебден, келигиз, былайда сабийле сюйюб тынгыларча, окъурча, аланы тиллерине сюймекликлерин уллу этерча, назмула, нарт сёзле, джомакъла джазайыкъ.
 
Буз Акканы юсюнден бир ариу назмучукъ окъугъанма аны биринчи джазайым

Ой Буз Акка, Буз Акка!
Мыдахлыкъны буз Акка.
Боранынгы боранла,
Чарсха чаба орамда!

Ой Буз Акка, Буз Акка
Къыш оюула сыз, Акка
Чегетлеге сыртлагъа
Къойма мени джукъларгъа.

Кел сен мени къатыма,
Миниб кийик атынга
Тонунгу бир этегин
Кесиме тон этеим.

Аллах алай буйуруб:
Сабийчикле джыйылыб,
Топ-топ эте келсинле,
"Тепсе, Акка!"- десинле.

Барамтадан къоркъмазгъа
Сен кесинге баз терек!
Буз Акканы акъ тонун
Кийисин, нызы, наз терек!
Магъаяланы-Гапполаны Аминат
 
Девушка Гор
ай-хай эсибизде турсала уа дейд, ол джомакъла
 
Мен гитче къарнашчыгъымы джукълатама деб бир кере бир сейир таурух айтыб сирелген эдим алгъаракъда. ма ол таурух

Эртде-эртде бир киши бла бир къатын джашагъандыла. Аланы бир гитче джашчыкълары болгъанды. Сора бир кюн-бир, ойнай-ойнай джашчыкъ чегетге кириб кетгенди. Тёгерекге къараса киши джокъ! "Аттяяяяя! Анняяяяя!" деб къычырса киши джууаб бермейди. Кюн кеч болуб бара эди, алай болгъанлыкъгъа джашчыкъ къоркъмай, тёгерекге къараб, сиреле эди. Бек батыр джашчыкъ эди ол. Сор кекке къарады да, сол джанындан оджакъдан чыкъгъан тютюнге ошатды бир затны. "Анда адамла бар болурла"- деб, ары тебреди. Бар да бар, бар да бар, кёёёёб заманны барды. Алай эте юйюне дери джетди да къалды - блайда джукълаб къалды къарнашчыгъым, ол себебли кесигиз бошарсыз бу таурухну
 
Рамла
ай-хай эсибизде турсала уа дейд, ол джомакъла
Бирге тюшюреик эсибизге унутханыбызны
 
Менда къошаим бир таурухчукъ. Атам гитче къарнашыма айтыучанеди, менда юйде сабийлеге айтама.

Эртде, эртде бир эшекчик джашагъанды, ол анасыны айтханын этмей чегетге къачыб кетгенди. Сора бёрюге тюбегенди. Бёрю ашайма деб чапханында, эшекчик андан къачды. Къачыб бара тургъанлай аллында бир уллу чунгур кёрдю. Аны башы бла алееее-оп деб чынгады, аман бёру уа кёрмеин ары тюшдю. Сора олтуруб джылайды анда бёрю. Бир заманда тынгласа, трам-пам-пам деб къоянчыкъ келе тура: къоянчыкъ, къоянчык, сен мени бундан чыгъар, мен сенге къобустачыкъ, быхычыкъ берликме. Къоянчыкъ сагъыш этгенди: и бу, аман бёрю, менге къачан игилик этгенди.
- тур бунда, аман бёрю, деб кетгенди.
Биягъы бёрю джылай къалды. Джылай тургъанлай, ля-ля-ля деб тюлкючукъ келе турады.
- тюлкючюк, тюлкючюк, сен мени бундан чыгъар, мен сенге таукъла, къазла берликме.
- Алдайса, аман бёрю, тур бунда, къал бунда, деб кетди тюлкючюкда. Бёрю джылай къалды. Бир заманда тынгласа: иа-иа-иа деб эшекчик келе тура.
-Эшекчик, эшекчик, сен мени бундан чыгъар, мен сени кирсиз суучукъ, татымлы хансчыкъ ёсген джерге элтирме. Тели эшекчик кертида ийнаныб, башын чунгургъа узатды, сора бёрю къулагъындан къабыб, эшекчик аны тартыб чыгъарды.
-Энди уа ашайма, деб эшекчикни ашадыда къойду алдаукъчу бёрю.
Сора тоюб терек тюбюнде къалкъыды. Бир заманда Анзорчукъ (имя ребёнка) атха миниб, шкогунда сыртына тагъыб чегетге келди. Къараса, бёрю джукълаб тура. Шкогун алыб ТАААРХ деб бёрюну ёлтюрдю, сора ариуу союб терисин юйюне анасына алыб келди, атын баугъа джыйды, шкогун къабыргъада чюйге такъды, тешиниб орунга джатыб джукълаб къалды.

Къызы-джашыда бек къуаныб джукълайла.
 
Гитче заманымда анням бир кёб айта эди муну, энди уа гитче эгешчиклериме-къарнашчыкъларыма айтады:
Бара-бара баз табдым
Бара-бара баз табдым,
Баз ичинде таракъ табдым,
Таракъны аммагъа бердим,
Амма манга баппу берди.
Баппуну итге атдым,
Ит манга кючюк берди,
Кючюкню къойчугъа бердим,
Къойчу манга къозу берди,
Къозуну къонакъгъа сойдум,
Къонакъ манга къамчи берди,
Къамчини джерге урдум,
Джер манга чёмюч берди,
Чёмючню суугъа атдым,
Cуу манга кёмюк берди.
Кёмюкню тапхагъа салдым
Ары джанындан бир мияу,
Бери джанындан бир мияу,
Келдиле да хап-хуп дедиле да,
Ичдиле да кетдиле.
 
Бу назмучукъну сабийлеге азбар этдирсек иги боллукъ эди, эслеринде тутарча:
Светофорну юч кёзю:
Къызыл джанды -
Тохта, сюел.
Сары джанса,
Эс бёл, сакъла.
Джашилге уа -
Бар джолунга!

6 джыл болгъан эгешчигиме юретгенмеда, энди къуру да светофор болгъан джер бла джюрюйдю. Сакълагъан заманда уа, бу назмуну да айтыучанды, тёгерегиндегилени сейирсиндире.
 
Девушка Гор
МашаАллах, керти аламат, керек назмучукъ!!!
 
Рамла
Былай бла, ана тилибизни кючю бла юретсек сабийлени иги халиге, кеслерин тутаргъа, андан игиси болмаз эди, деб келеди кёлюме. Артыкъсыз да бек республикабызны тышында джашагъанлагъа.
 
Эсиме тюшгени бла джазыб къояйым:
Эртде биреу бар эди,
Темир тиреу бар эди,
Таш тегене бар эди,
Агъач элек бар эди,
Къумурсханы къой этиб,
Къумгъа джайгъан бар эди.
Сенгирчгени ат этиб,
Сыртха чыкъгъан бар эди.
Къарт анасын джаш этиб,
Тойгъа элтген бар эди.
Къарт атасын джаш этиб,
Къатын алгъан бар эди.
Къара сууну къайнатыб,
Къаймакъ алгъан бар эди.
Ёлген атны сау этиб,
Чаришге чабхан бар эди.

Къалай ариуду, байды тилибиз!
 
Акъыллычыкъ
туура бизни гитче сагъатчыгъыбыздача.

Энтда бир къошаим, алая аягъын эсиме тюшюралмайма, билген бир болушсагъыза)))

Ой, юшюдюм, юшюдюм,
Таудан алма тюшюрдюм.
Алмачыгъымы къабдыла
Менге зыгыт (может и другое слово) атдыла.
Бу зыгытха базама, бу загытха базмайма,
Терен уру къазама
Терен уруну ичинде беш эчки.
беш эчкини улагъы отда къазан къайнады... дальше не помню((((
 
Ой, юшюдюм, юшюдюм,
Таудан алма тюшюрдюм.
Алмачыгъымы къабдыла,
Манга зыгыт атдыла.
Мен зыгытха базама,
Терен урну къазама.
Терен урда беш эчки,
Беш эчки бла бир улакъ.
- Улакъчыкъ а къайдады?
Къазанчыкъда къайнайды,
Умар эшикде ойнайды.
Умар кетди отуннга,
Къаргъа битди бутуна,
Къаргъа тюлдю, къамишди,
Он бармагъы кюмюшдю,
Ал тишлери хиришди.

Былай болур эди дейме
 
Девушка Гор
незнакомое окончание может кто ещё вариант подкинет или я после НГ с аула привезу)))))
 
Ханума
незнакомое окончание может кто ещё вариант подкинет или я после НГ с аула привезу)))))
Сюйгенигизча этигиз. Сиз да башха тюрлюсюн табсагъыз -джазарсыз, сюйюб окъурукъбуз. Мен эшитген былайды. Алай а, эл ауузда джюрюген зат тюрлене баргъанына нек сейирсинесиз
 
Девушка Гор
сеирсинмейме чыртда эл ауузда джюрюген зат тюрлене баргъанына шагъатлыкъ этеме

Башында Акъыллычыкъ хар сёзюн да биз билгенча джазгъанында Октябрь элде ми ёсгенсе дей башлагъан эдим.
 
Ханума
Башында Акъыллычыкъ хар сёзюн да биз билгенча джазгъанында Октябрь элде ми ёсгенсе дей башлагъан эдим.
Огъай-огъай. Акъыллычыкъны уа кесим ёсдюргенме Ташкёпюр элде! Ма бу былайда джазылгъан назмуланы окъуй!
 
Тергеу
Къакъ-къакъ эте, къаргъала
Терекге келиб къондула,
Алагъа да тёрт къошулду,
Барысыда он болдула.

Бир къаууму учуб кетди,
Учмай къалды тамам джети,
Алгъын келиб ненча къонду?
Учуб кетген ненча болду?
Сабийлеге окъуй турургъа боллукъду муну да.
 
Девушка Гор
Ой, юшюдюм, юшюдюм,
Таудан алма тюшюрдюм.
Алмачыгъымы къабдыла,
Манга зыгыт атдыла.
Мен зыгытха базама,
Терен урну къазама.
Терен урда беш эчки,
Беш эчки бла бир улакъ.
- Улакъчыкъ а къайдады?
Къазанчыкъда къайнайды,
Умар эшикде ойнайды.
Умар кетди отуннга,
Къаргъа битди бутуна,
Къаргъа тюлдю, къамишди,
Он бармагъы кюмюшдю,
Ал тишлери хиришди.


 
Рамла
Сау болугъуз, ансын, кертида терсми джаздым деб сагъыш эте турама.
 
Девушка Гор
терс-тюз эсе да билмейме, алай а джаратдым, ма блайында уа кюлюб, джыгъылыб кете эдим аздан къалса :
- Улакъчыкъ а къайдады?
Къазанчыкъда къайнайды,


 
Сиз кече сабийчиклеригиз иги джукъларча алагъа бешик джырла (белляула) джырлаймысыз? Бир-эки ариу джыр джазайым, къарт анням джырлаучанды туудукъларына:
Сау къутулгъун бешигингден, дейме,
Ойнай киргин эшигингден, дейме.
Бешигинги бауу болсун сары алтын,
Сабанларынг толу джетиб саргъалсын.
Сени джолунг къыйын болмай, ёр болсун,
Сени душманынгы джетер джери кёр болсун.
Джукъла, балам, сенден алгъын ёлейим,
Эртден бла эртте туруб кёрейим.
Олтурур джеринг тёр болсун, балам.
Кийик джолларынг ёр болсун, балам.
Игиле ичинде айтылгъын балам,
Ананг сюйгенча айныгъын балам!
 
Менге анам сабий заманымда "Кече джарыкъды, тёгерек шошду..." деген белляу айта эди. Эм бек аны сюеме! Ким биле эсе да- толусу бла бир джазарсыз ол белляуну, бырда бир ариу сёзлери барды!
 
Рамла
"Кече джарыкъды, тёгерек шошду..."
Тюзюн айтсам, эшитмегенме быллай джыр Аннядан сорургъа керекди
 
Кече джарыкъды
Тёгерек шошду
Бир къайгъы этме,сен джукъла
Мен да сакълайма сени джукъунгу
Джукъла джаным, татлы джукъла!
...
 
 
Страницы: 1 2 3 4 След.
Читают тему (гостей: 1)

 

Написать нам