- Къартны сыйын кёрмеген, къартлыгъында сыйлы болмаз.
- «Ма», - дегенни билмесенг, «бер», - дегенни билмезсе.
- Таугъа чыгъаллыкъ эсенг, тюзде къалма.
- Суугъа – таянма, джаугъа – ийнанма.
- Эшекге миннген – биринчи айыб, андан джыгъылгъан – экинчи айыб.
- Билимсиз иш бармаз.
- Аманны къуугъан, аманлыкъ табар.
- Сабийни джумушха джибер да, ызындан бар.
- Сыфатында болмагъаны, суратында болмаз.
- Ёгюзню мюйюзлери ауурлукъ этмейдиле.
- Кёл ашады да, кеси ашады.
- Ауузу бла къуш тута айланады.
- Тёгюлген тюгел джыйылмайды.
- Борчунг бар эсе, хурджунунга ойлаб узал.
- Тамбла алтындан бюгюн багъыр ашхы.
- Къызгъанчдан ычхыныр, мухардан ычхынмаз.
- Ачылгъан эт джабылыр, кёрген кёз унутмаз.
- Кеси юйюмде мен да ханма.
- Джюрекге ариу – кёзге да ариу.
- Келинин тута билмеген, къул этер, къызын тута билмеген, тул этер.
- Джыйырма къойну юч джыйырма эбзе кюте эди.
- Халкъгъа джарагъан, джарлы къалмаз.
- Къартны бурнун сюрт да, оноугъа тут.
- Телиге акъыл салгъандан эсе, ёлгеннге джан салырса.
- Уллу сёлешме да, уллу къаб.
- Нарт сёз къарт болмаз.
- Джылыгъа джылан илешир.
- Бал ашаргъа сюе эсенг, чибин ургъаннга тёз.
- Иги джашны ышаны – аз сёлешиб, кёб тынгылар.
- Айтханы чапыракъдан ётмеген.
- Эринчекни эр алмаз, эр алса да, кёл салмаз, кёл салса да, кёб бармаз!
- Чалманны аллы къалай башланса, арты да алай барады.
- Джаз бир кюнню джатсанг, къыш талай кюнню абынырса.
- Ашын ашагъанынгы, башын да сыйла.
- Эм ашхы къайын ана мамукъ бла башынгы тешер.
- Ана къойну – балагъа джандет.
- Биреу къой излей, биреу той излей.
- Аууз сакълагъан – джан сакълар.
- Бойнуму джети джерден кессенг да, мен ол ишни этеллик тюлме.
- Къарт болгъан джерде, берекет болур, сабий болгъан джерде, оюн болур.
- Иги адамны бир сёзю эки болмаз.
- Аллахха ийнаннган кишини, Аллах онгдурур ишин.
- Аурууну келиую тынч, кетиую – къыйын.
- Кесине гебен этелмеген, биреуге черен эте эди.
- Сибиртки да сыйлы болду, кюрек да кюнлю болду.
- Кимни – тили, тиши онглу, кимни – къолу, иши онглу.
- Окъуу – билимни ачхычы, окъуу – дунияны бачхычы.
- Тау башында, тау болмаз, джангыз терек, бау болмаз.
- Чабакъгъа акъыл, табагъа тюшсе келеди.
- Бичгенде ашыкъма, тикгенде ашыкъ.
