- Мал кёб болса, джууукъ кёб болур.
- Иги бла джюрюсенг, джетерсе муратынга, аман бла джюрюсенг, къалырса уятха.
- Къатын байлыкъны сюер, эр саулукъну сюер.
- Атлыны кёрсе, джаяуну буту талыр.
- Чакъырылмагъан къонакъ къачан кетерин сормаз.
- Къатын къылыкъсыз, эр тынчлыкъсыз.
- Кёб къычыргъандан – къоркъма, тынч олтургъандан – къоркъ.
- Тёзгеннге, джабылгъан эшик ачылыр.
- Таш бла ургъанны, аш бла ур.
- Бек ашыкъгъан меннге джетсин, дегенди аракъы.
- Биреу ашаб къутулур, биреу джалаб тутулур.
- Мухар, кеси тойса да, кёзю тоймаз.
- Кёзден кетген, кёлден да кетеди.
- Айырылмаз джууугъунга, унутмаз сёзню айтма.
- Ётюрюкден тюбю джокъ, кёлтюрюрге джиби джокъ.
- Тойгъа барсанг, тоюб бар, эски тонунгу къоюб бар.
- Баш – акъыл ючюн, акъылман – халкъ ючюн.
- Чомарт бергенин айтмаз.
- Чомарт къолда мал къалмаз.
- Ашатыргъа иш – ашхы, ишлетирге аш – ашхы.
- Татлы сёз – балдан татлы.
- Ата Джуртун танымагъан, атасын да танымаз.
- Эл ауузу – элек, анга ийнаннган – халек.
- Тил – миллетни джаны.
- Джашлыкъ этмеген, башлыкъ этмез.
- Ата – билек, ана – джюрек!
- Игиге айтсанг – билир, аманнга айтсанг – кюлюр.
- Керилген да, ургъан кибикди.
- Къатыны харакетли болса, эри къымсыз болур.
- Бёрю да ач къалмасын, эчки да ашалмасын.
- Окъуу – билимни ачхычы, окъуу – дунияны бачхычы.
- Джарлы эскисин джамаса, къууаныр.
- Ач отунчуну ачыуу – бурнунда.
- Эрни эр этерик да, къара джер этерик да, тиширыуду.
- Байны къызы баймакъ болса да, юйде къалмаз!
- Джангыз торгъай джырламаз.
- Нарт сёз – тилни бети.
- Къралынгы – душмандан, башынгы от бла суудан сакъла.
- Зар адамны насыбы болмаз.
- Тойгъа алгъа да барма, тойда артха да къалма.
- Насыб бютеу халкъны юлюшюдю.
- Къанны къан бла джуума, аманны аман бла къуума.
- Къайгъыны сюйген, къайгъы табар.
- Борчунг бар эсе, хурджунунга ойлаб узал.
- Адам боллукъ, атламындан белгили болур.
- Ёзденликни джайгъан – джокълукъ.
- Адеб джокъда, намыс джокъ.
- Кийимни бичсенг, кенг бич, тар этген къыйын тюлдю.
- Джол бла сёзню къыйыры джокъ.
- Кюн – узун, ёмюр – къысха.
Ошибка!
Для просмотра темы введите ваши логин и пароль.Пожалуйста, авторизуйтесь: