- Урама да – ёледи, сатама да – келеди.
- Тойгъа алгъа да барма, тойда артха да къалма.
- Ата Джуртча джер болмаз, туугъан элча эл болмаз.
- Борчунг бар эсе, хурджунунга ойлаб узал.
- Къыйынлы джети элге оноу этер.
- Акъыллы эркиши атын махтар, акъылсыз эркиши къатынын махтар.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Хар зат кесини орнуна иги.
- Айранын берсенг, челегин да къызгъанма.
- Нёгерсизни джолу узун.
- Мал тутхан – май джалар.
- Ишленмеген джаш – джюгенсиз ат, ишленмеген къыз – тузсуз хант.
- Тёзгеннге, джабылгъан эшик ачылыр.
- Гыдай эчки суугъа къараб, мюйюзле кёрмесе, джашма алкъын, дегенди.
- Хансыз джомакъ болмаз.
- Бал ашаргъа сюе эсенг, чибин ургъаннга тёз.
- Игини сыйлагъан адетди.
- Билмезни кёзю кёрмез, этмезни къулагъы эшитмез.
- Ашхы тенг джолгъа салыр, аман тенг джолдан тайдырыр.
- Ышармагъан – кюлмез, кюлмеген – къууанчны билмез.
- Джаханимни кёрмей, джандетге кёл салмазса.
- Ауругъаннга – кийик саулукъ, джетген къызгъа – чилле джаулукъ.
- Аманнга игилик этсенг, юйюнге сау бармазса.
- Адеби болмагъан къыз – тузсуз хант.
- Къаллай салам берсенг, аллай джууаб алырса.
- Къартны бурнун сюрт да, оноугъа тут.
- Ашатыргъа иш – ашхы, ишлетирге аш – ашхы.
- Джумушакъ терекни къурт ашар.
- Тик ёргени, тик энгишгеси да болады.
- Тамбла алтындан бюгюн багъыр ашхы.
- Акъыллы айтыр эди, акъылсыз къоймайды.
- Кийиминг бла танылма, адамлыкъ бла таныл.
- Ана къолу ачытмаз.
- Зар адамны насыбы болмаз.
- Мухар, кеси тойса да, кёзю тоймаз.
- Ётген ёмюр – акъгъан суу.
- Экеулен сёлеше тура эселе, орталарына барыб кирме.
- Киштикге къанат битсе, чыпчыкъ къалмаз эди.
- Джюз элде джюз ёгюзюм болгъандан эсе, джюз джууугъум болсун.
- Чомарт къолда мал къалмаз.
- Бичгенде ашыкъма, тикгенде ашыкъ.
- Кимни – тили, тиши онглу, кимни – къолу, иши онглу.
- От этилмеген джерден тютюн чыкъмайды.
- Чабакъгъа акъыл, табагъа тюшсе келеди.
- Биреуню эскиси биреуге джангы болмайды.
- Аз сёлешген, къайгъысыз турур.
- Джашда акъыл джокъ, къартда къарыу джокъ.
- Игилик игилик бла сингдирилиучю затды.
- Тыш элде солтан болгъандан эсе, кесинги элде олтан болгъан игиди!
- Таугъа чыгъаллыкъ эсенг, тюзде къалма.
Ошибка!
Для просмотра темы введите ваши логин и пароль.Пожалуйста, авторизуйтесь: