- Элиб деген, элге болушур.
- Ариу сёз джыланны орнундан чыгъарыр.
- Аман эсирсе, юйюн ояр.
- Эри аманны, къатыны – аман.
- Тюкюрюк баш джармаз, налат кёз чыгъармаз!
- Тай асырагъан, атха минер.
- Башы джабылгъан челекге, кир тюшмез.
- Гырджын – тепсини тамадасы.
- Акъыллы – эл иеси, тели – эл баласы.
- Ариу – кёзге, акъыл – джюрекге.
- Баш болса, бёрк табылыр.
- Акъыллы эркиши атын махтар, акъылсыз эркиши къатынын махтар.
- Малны кют, джерни тюрт.
- Кёз – сюйген джерде, къол – ауругъан джерде.
- Адеб джокъда, намыс джокъ.
- Олтуруб кёрюнмей эди да, ёрге туруб кёрюне эди.
- Бир абыннган – минг сюрюнюр.
- Бозаны арты дауур болур.
- Тенгни тенглиги джашай барсанг билинир.
- Ойнаб айтсанг да, эслеб айт.
- Аман къатын сабий табса, бий болур…
- Аманны эки битли тону болур, бирин сеннге кийдирир, бирин кеси киер.
- Джюрек кёзден алгъа кёрюр.
- Башсыз урчукъ тюзюне айланмаз.
- Ичимден чыкъды хата, къайры барайым сата?
- Бастасын ашагъан, хантусун да ичер.
- Зар адамны насыбы болмаз.
- Аман адамны тепсинге олтуртсанг, къызынгы тилер.
- Бал – татлы, балдан да бала – татлы.
- Къонакъ хазыр болгъанлыкъгъа, къонакъбай хазыр тюлдю.
- Окъ къызбайны джокълайды.
- Аман адам этегингден тутса, кес да къач.
- Айранны сюйген, ийнек тутар.
- Джеринден айырылгъан – джети джылар, джуртундан айырылгъан – ёлгюнчю джылар.
- Тёгюлген тюгел джыйылмайды.
- Хар сёзню орну барды.
- Къобан да къуру да къобханлай турмайды, адам да къуру да патчахлай турмайды.
- Ашарыкъда сайлагъаннга – чий гырджын.
- Ауругъаннга – кийик саулукъ, джетген къызгъа – чилле джаулукъ.
- Ёлген аслан – сау чычхан.
- Ишлемеген – тишлемез.
- Башланнган иш битер, къымылдагъан тиш тюшер.
- Къарны аманнга къазан такъдырма, къолу аманнга от джакъдырма.
- Адамгъа аман кюн соруб келмейди.
- Къызбайны юйюне дери сюрсенг, батыр болур.
- Айыбны суу бла джууалмазса.
- Ашда – бёрю, ишде – ёлю.
- Билимсиз иш бармаз.
- Тилчиден кери бол.
- Эки къатын алгъанны къулагъы тынгнгаймаз.
Ошибка!
Для просмотра темы введите ваши логин и пароль.Пожалуйста, авторизуйтесь: