Тёзгеннге, джабылгъан эшик ачылыр.
Бойнуму джети джерден кессенг да, мен ол ишни этеллик тюлме.
Адеб джокъда, намыс джокъ.
Чомартха хар кюн да байрамды.
Къайгъыны сюйген, къайгъы табар.
Биреуге аманлыкъны тилеме да, кесинге ашхылыкъны тиле.
Татлы сёз – балдан татлы.
Джашда акъыл джокъ, къартда къарыу джокъ.
Къыйынлы джети элни къайгъысын этер.
Уллу къашыкъ эрин джыртар.
Адебсиз адам – джюгенсиз ат.
Адамны аманы адамны бети бла ойнар.
Келинни – келгинчи, бёркню кийгинчи кёр.
Джерни букъусу кёкге къонмаз.
Кёбден умут этиб, аздан къуру къалма.
Келинин тута билмеген, къул этер, къызын тута билмеген, тул этер.
Бозанг болмагъан джерге, къалагъынгы сукъма.
Адам сёзюнден белгили.
Къарнынг къанлынга кийирир.
Джумушакъ терекни къурт ашар.
Къумурсхала джыйылсала, пилни да джыгъадыла.
Босагъа таш юйге кирмей эди, тыбыр таш эшикге чыкъмай эди.
Тюзлюк шохлукъну бегитир.
Тёрени джагъы джокъ.
Иги – алгъыш этер, аман – къаргъыш этер.
Келлик заман – къартлыкъ келтирир, кетген заман – джашлыкъ ёлтюрюр.
Ишлерге уял да, ашаргъа табма.
Бет бетге къараса, бет да джерге къарар.
Иги сёз – джаннга азыкъ, аман сёз башха – къазыкъ.
Уруну арты – къуру.
Кёб джашагъан – кёб билир.
Бал ашаргъа сюе эсенг, чибин ургъаннга тёз.
Кесинге джетмегенни, кёб сёлешме.
Туз, гырджын аша, тюзлюк бла джаша.
Аллахдан тилесенг, кёб тиле.
Юй кюйдю да, кюйюз чыкъды, ортасындан тюйюш чыкъды.
Алма терегинден кери кетмез.
Ата Джуртун танымагъан, атасын да танымаз.
Джети тилни билген джети кишиди.
Тилде сюек болмаса да, сюек сындырыр.
Аллахха ийнаннган кишини, Аллах онгдурур ишин.
Тас болгъан бычакъны сабы – алтын.
Душманны тышы – акъ, ичи – къара.
Иги джашны ышаны – аз сёлешиб, кёб тынгылар.
Ауругъаннга – кийик саулукъ, джетген къызгъа – чилле джаулукъ.
Мухар, кеси тойса да, кёзю тоймаз.
Тура эдим джата, къайдан чыкъды хата?
Билимли ёлмез, билимсиз кёрмез.
Джаш болсун, къыз болсун, акъылы, саны тюз болсун.
Ачлыкъ отха секиртир.
