3 Суура Али Имран - Имранны тукъуму.
Рахматлы, джумушакъ Аллахны аты бла.
1 . Алиф. Лаам. Миим. (Муну юсюнден тюрлю-тюрлю айтыула бардыла. Алимлени бир къаууму магъана берирге кюрешедиле. Алай болса да аны магъанасын Уллу Аллах Кеси биледи).
2. Аллах аллайды: Андан ёзге, башха бир тюрлю бир табыныр зат болмагъан, хаманда сау, хаманда бирча, тюрленмей тургъан.
3. (Мухаммад) алда келген (китабланы) да кертилигин бегите келген, Ол сеннге хакъ китабны тюшюрдю (Къуранны. Ол бурун келген китабланы ётюрюк этмейди. Ол аланы хакъ бир Аллахдан келгенлерин бегитеди. Алай а аланы келгенлерича къоймай, тюрлендиргендиле, къошакъла, къоракъла этгендиле. Ол китабла бузулгъанлары себебли, ала бла ишлерге джарамайды. Аллаху Тагъаланы Кесини борчуду, джер юсюнде, халкъ арасында хакъны айтхан китабын-законун тутаргъа. Уллу Аллах Кеси да эм артда ийген китабы - Къуранны Къыямат кюннге дери, аны буздурмай, джаудан сакъларгъа бойнуна алыбды). Ол Тауратны да, Инджилни да тюшюрген эди.
4. Ол аланы буруннгулагъа тюз джолну кёргюзе, хакъны, ётюрюкню айырыр ючюн тюшюрген эди. (Динлени арасында тартышны да Къуран ариу айырыб береди. Адамла ангылар керекли, динле не ючюн бёлюннгенин, арагъа айрылыкъ тюшюбдю. Ол адамланы терсликлери бла бёлюнюб кетгенин аз адам ангылайды. Уллу Аллахны дини уа, башындан башлаб да, бирди. Ол да ислам динди. Ислам деген сёзню магъанасын ангылар керекли кёбле къатышадыла. Ол къой эсенг джау да боладыла. Аны магъанасы уа, дунияланы да, хар нени да къурагъаннга, аланы арасында инсанны да джаратханнга бойсунуб, берилиб тохтамакъды. Динлеге бёлюннгенле бу сёзню магъанасын толу ангыласала, бёлюнюр зат да джокъду, джау болур зат да джокъду. Адам улуну джаратхан Аллахы бирди. Бары да халкъла Ол Аллахха ийнанабыз деб къычырадыла. Бир-бири бла джау болууну уа тохтатмайдыла. Ол а игитда шайтанны ишиди). Ишексиз, Аллахны аятларына ийнанмагъанлагъа къаты азаб хазырды. Аллахны уа (терследен) къанын алыргъа къолундан келир.
5. Ишексиз, Аллахха не кёкде, не джерде бир зат да таша тюлдю.
6. Ол аллай Аллахды: ананы къарнында, Кеси сюйгенича, сизге сыфат берген. Андан ёзге аллах деб джукъ болмагъан, Къудретли, Акъылман.
7. (Мухаммад) дагъыда Ол сеннге китаб эндирди. Аны ичинде магъаналары ачыкъ ангылашхан аятла да бардыла. Ала китабны (ала бла оноу этген) тамалыдыла. Алада магъаналары иги, ачыкъ ангылашынмагъанла да бардыла. Джюрекде бегим болмагъанла уа бузукълукъ излеб, магъаналары ачыкъ ангылашынмагъан аятланы ызындан барыб, терсеедиле. Алагъа терс магъанала излеб, (муслиманланы) къатышдырыргъа, къозгъаргъа кюрешедиле. Аланы хакъ магъаналарын, Аллах Кеси болмаса, киши билмейди. Билимде бегиб тургъанла уа: "Ала бары да Раббибизден болгъанына ийнандыкъ", - дедиле. Алай а аланы къуру акъыл иелери ангылаб тюшюнедиле.
8. Ала: "Эй, Раббибиз! Бизни тюз джолгъа тюзетгенингден сора, экинчи джюреклерибизни тайдырма! Бизге Кесинги рахматынгы да бир саугъала! Ишексиз, Сен (излегеннге) саугъалаучуса. (Адамны биринчи джюреги таяды хакъдан, сора адам терсине сёлешиб, терсине ангылаб, терс джюрюб тебрейди. Алай болмаз ючюн джюрек биринчи хакъны ангыларгъа керекди. Алай а хакъны ангылагъандан сора да, бир адамгъа да тюз джолдан таймай турургъа ышаныу джокъду. Ол себебден, адам кесине ышанмай, Уллу Аллахына джалбара, тилей турургъа керекди).
9. Эй, Раббибиз! Ажымсыз, аз да ишеклик болмагъан Къыямат кюннге адамланы джыярыкъса,. Ишексиз, Аллах а берген сёзюн бузмайды", - дедиле.
10. Ишексиз, къаршчы болгъанланы уа (Къыямат кюн) Аллахны аллында, чыртда, не байлыкълары, не балалары къутхармаз. Ала джаханимге отун болурла.
11. Фыргъауунну да, ары дери джашагъан ассы къауумну да къутхармагъан кибик. Ала да Бизни аятларыбызны ётюрюк этген эдиле, Аллах да аланы ассылыкълары ючюн азабха тутхан эди. Аллах а азаб бериуде бек къатыды.
12. (Мухаммад) сен ол кяфыр къауумгъа: "Сиз хорланнган да этериксиз, джаханимге да джыйыллыкъсыз", - деб айт. Ол а къалай аман орунду.
13. Сизге (Бадру къазауатда) эки къауум аскер бир-бири бла тюбешиулеринде сейир оюм барды. Бири Аллах джолунда къазауат этди, ол бири уа Аллахха къаршчы къазауат этди. Кёз къарам бла, была аланы (гяуурланы) санларын, кеслерича, эки къат кёрдюле. (Муслиманла ючджюзден аслам, кяфырла уа минг чакълы бир болгъандыла. Аз болсала да, муслиманла хорлагъандыла). Аллах а кимге сюйсе, анга болушлугъу бла билек болады. Ишексиз, бу ишде (джюрек) кёзю кёралгъаннга оюм барды. (Кёбюсюне адамла Уллу Аллахны сейир ишлерине терен къарар керекли, аланы эслемей къоядыла. Хакъны кёрген адамны тышында кёзлери тюлдю, джюрек кёзюдю. Кёб адам сагъыш этер керекли, хакъны кёралмай, анга сансыз болуб, къуру къалыб кетедиле).
14. Адамланы джюреклерине ариу кёрюнюб терилиб алданадыла: (сыналадыла) тиширыулары, балалары, алтындан, кюмюшден джыйгъан къынтарлары (алтын ачханы ёлчеси), тамгъалы атлары, хайуанлары, сабанлары. Ала бары да бу дунияда адам бир кёзюуге дери хайырланнган хаух затладыла. Аллахны джанында уа ары келликлеге эм ариу орунла хазырды.
15. Сен алагъа: "Мен сизге аладан эсе хайырлы затланы айтайыммы? Аллахдан къоркъгъанлагъа Раббисини джанында тюбю бла суула баргъан, ёмюрге анда турурлай джаннетле, таза болгъан юйбийчеле. Аллахны да разылыгъы", - деб айт. Аллах а Кесини къулларын толу кёрюбдю.
16. "Эй, Иебиз! Ишексиз, биз Сеннге ийнандыкъ, гюнахларыбызны бир кеч, джаханим отну азабындан да сакъла!", - деб тилегенлени;
17. (дуниягъа хорлатмай) сабырлыкъ этгенлени, ийманда тюз тургъанланы, Аллахдан уялыб буюкъгъанланы, (къызгъанчлыкъ этмей) Аллах разылыгъы ючюн, рысхыларын джойгъанланы, сараш кёзюуледе туруб, Аллахдан кечмеклик тилеучюлени.
18. Бирден сора табыныр джукъ болмагъанына Аллах Кеси да, Аны мёлеклери да, тюзлюкню тутхан илму иелери да (алимле) Къудретли, Акъылман Аллахдан ёзге, башха аллах болмагъанына шагъатлыкъ этедиле. (Бусагъатда белгили учёныйле уллу джетишимле этиб, астрономияда да, медицинада да, д.а.к. кёб затланы ачыкълаб, ала да Къуран айтхан бла ариу келишиб, дунияланы къурагъан Ие бир джангыз болгъанын бегитедиле. Бурундан бери да акъыл иелери, учёныйле Аллахны бирлигин, барлыгъын, хакълыгъын бегите келгендиле. Аллахны хакълыгъына къуру, къарангы къауум, акъыллары бла джукъну сюзе билмеген, ашагъанына, кийгенине къууаныб, хайуанча джашаб тургъан адам чайкъалады).
19. Ишексиз, Аллах джанында (къабыл болгъан) дин - ол ислам динди. Китаб берилгенле тартышыб, даулашыб тургъанлары уа, алагъа (Аллахдан) билим келиб бошаб тургъанлай, джюреклери зарлыкъдан, биле-биле, этедиле. Аллахны аятларына ийнанмай, къаршчы болуб тургъанла уа (ангыласынла), эсеблеуде Аллах бек теркди.
20. Ала сени бла къарышыб, даулашыб турсала, сен алагъа: "Мен Аллахха берилгенме, джюзюмю да (бетими) Анга бургъанма, мени ызымдан келгенле, ала да", - деб айт. Дагъыда сен ол китаб берилгенлеге да, китаб берилмей джахил къалгъанлагъа да: "Сиз Аллахха берилдигизми?" - деб сор. Аллахха берилген эселе, ала да тюз джолдадыла. Алай болмай арт бурсала уа, сени борчунг къуру аманатны джетдириудю. Аллах а къулларын кёрюбдю.
21. Аллахны аятларына ийнанмай, къаршчы болуб, хакъсыз файгъамбарланы ёлтюргенлени да, халкъгъа тюзлюкню буюргъан адамланы ёлтюргенлени да, (Мухаммад) алагъа термилтген азаб болурун айтыб къууандыр.
22. Ала дунияда, ахыратда да этген амалларын, къуллукъларын зыраф этгенледиле. Алагъа бир болушлукъ табылмаз.
23. (Мухаммад) сен кёрдюнгмю? Ол Аллахдан кеслерине китабдан юлюш берилгенле, араларында хукму этерге Аллахны китабына (Къураннга) чакъырылгъан заманда, аладан бир къаууму бурулуб кетдиле.
24. Аны себеби: "Бизге джаханим от, бир санау кюнле болмаса, чыртда джетерик тюлдю", - дегенлери ючюн. Ала кеслери джанларындан чыгъаргъан затла бла динлеринде алданыб аджашыбдыла. (Чууутлула алтын бузоугъа табыннган къыркъ кюнлери ючюн айтхандыла. Мухаммадха къаршчы, хар затха бир зат табыб келгендиле. Алтын бузоугъа табыннган къыркъ кюнлерине джукъ сылтау табалмагъандыла. Сора амалсыз болгъанларында айтхандыла бу аятда сылтауну, китабларында болмагъан затны, баш алыр ючюн).
25. Ишеклик болмагъан сюд кюн, Биз аланы аллыбызгъа джыйыб, алагъа не аз да артыкълыкъ болмай, хар джаннга этгенине кёре, толу хакъы берилген кюн къалай болурла ала сора?
26. Сен былай айт: "Эй, Аллахым, патчахланы барыны да Патчахы, Сен патчахлыкъны кимге сюйсенг, анга бересе, кимден сюйсенг, андан аласа, кимни сюйсенг, аны сыйлы этесе, кимни сюйсенг, аны сыйсыз этесе. Ашхылыкъ бары Сени (къудрет) къолунгдады. Ишексиз, Сен а хар неге да къолунгдан келиучюсе. (Чууутлула, бурундан бери да, дунияны башына бизбиз патчах деб, ёмюрю алай бегитиб келгендиле. Бюгюн-бюгече да ол къылыкъларын къоймай барадыла. Алай болса да Уллу Аллах аланы патчахлыкъларын сыйырыб, муслиманлагъа бергенди, ислам дин келген кёзюуде. Игитда ала ол затха разы болмагъандыла, бюгюн да тюлдюле разы. Алай болса да, аладан сыйырыб, башха къауумгъа патчахлыкъ бош берилмегенди. Ала китабларын, келечилерин сыйлаб тута билмей, алагъа уллукёллю болгъанлары ючюн, алагъа Уллу Аллах чамланыб, аны ючюн сыйыргъанды алчылыкъны).
27. Кечени кюндюзге кийиресе, кюндюзню да кечеге кийиресе, ёлгенден сауну чыгъараса, саудан ёлгенни да чыгъараса, (насыб) берирге сюйгенинге эсебсиз бересе", - деб.
28. Бир къоркъуу болмаса, ийман келтиргенле муъминлени къоюб, кяфырланы шохха тутмасынла! (Кяфырла бла ариу джашамакъны, артыкъсыз да хоншу болса, анга игилик этиуню дин кери урмайды. Алай а муслиман, гяуур деб айыра билмей, аланы да сюйюб, тенге тутуб, динни джауу, шоху деб да ангыламай джюрюуню юсюнден айтады аят). Алай этгеннге Аллах джанында джукъ джокъду. Аллах сизни Кесинден сакъ турургъа чакъырады. Барынгы да къайытырыгъыз Аллаххады.
29. Сен алагъа: "Сиз ишлеригизни джашырсагъыз да, ачыкъласагъыз да (башхасы джокъду) Аллах аланы билибди. Ол а кёкледе, джерде болгъан затланы барын да билибди. Аллахны уа хар неге да къудрети джетеди", - де.
30. Хар бир джан ашхылыкъ (сууаблыкъ) болуб не этген эсе, аманлыкъ болуб да не этген эсе, аллында аны хазыр болуб табхан кюн, сора ол: "Ай, анасыны, муну бла мени арам узакъ болса, не ашхы боллукъ эди", - дер. (Мында адам этген аманлыгъы иги кёрюнюб, неда сан этмей этиб баргъанлыкъгъа, Къыяма кюн ол бары ачыкъ болуб, азабха кете тебресе айтырыкъды ол сёзню). Аллах Кесинден сакъ турургъа чакъырады. Аллах а къулларына бек джумушакъды.
31. Сен алагъа: "Сиз Аллахны сюе эсегиз, мени ызымдан келигиз, ол заманда Ол да сизни сюер, гюнахларыгъызны да кечер", - де. Аллах а, ишексиз, кечиучюдю, рахматлыды. (Файгъамбар гъ.с. суннасын тутуу, ол Уллу Аллахны разылыгъына джетишдирген джолду).
32. Сен алагъа: "Аллахха да, Аны келечисине да бой салыгъыз, (ол экиси айтхандан, ала кёргюзгенден) джанласагъыз а билигиз, Аллах кяфырланы эрши кёреди!", - де. (Динни тамалын салгъан, аны башын башлагъан, дунияны башына джайгъан ол экисидиле. Не бир башха законлагъа алданыб, неда диннге адетлени къатышдырыб, адам ол экисини джолундан таймай къаллыкъ тюлдю).
33. Ишексиз, Аллах Адамны, Нухну, Ибрахимни тукъумун, Имранны тукъумун да саулай дунияны башында сайлаб алгъан эди, (ол адетни)
34. туудукъларына да кёчюре келген эди. Ол туудукъла бирлери бирлеринден эдиле. (Барыны да динлери бир эди, артдагъыла бёлек-бёлек этселе да). Аллах а нени да эшитеди, нени да биледи.
35. (Сен ангыла) Имранны тукъумундан тиширыу (Мариямны анасы): "Эй, Раббим! Мени бу къарнымдагъын (дуния ишледен) башына бош этиб, Сени эркинлигинге къояргъа (Бейтул Мукъаддасда сеннге къуллукъ этерге) нюзюр этдим. Мени нюзюрюмю Сен бир къабыл эт! Ишексиз, Сен (тилекни) эшитесе, (кереклини) билесе.
36. Сора ол аны табханында: "Эй, Раббим! Ишексиз, мен табхан къызды, Аллах а бек иги билиб эди аны не табханын, джаш къызча болмагъанын (къыз имам болалмайды), ишексиз, мен аны атына да Мариям атадым. Аны да, туудукъларын да налат берилген шайтанны заранындан сакъларгъа Сеннге аманат этдим", - деди. (Мариямны анасыны тилегине Уллу Аллах къыз берсе да, ол да тилегим къабыл болмады деб къыйналса да, Мариямдан туугъан уллу файгъамбар болуб, бюгюн-бюгече да джер юсюнде белгилиди).
37.Сора Раббиси тилегин ариу тукъум къабыл этиб, аны аламат ёсдюрдю. Аны Зекериягъа аманатха буюрду. (Акъса масджидни ичинде). Сора Зекерия михрабха киргени сайын, аны аллында тюрлю-тюрлю ашарыкъла табыб турду. Ол анга: "Эй, Мариям, была сеннге къайдан чыгъадыла?" - деди. Ол да: "Ала меннге Аллах джанындан келедиле", - деди. Ишексиз, Аллах насыб берирге сюйгенине эсебсиз, береди.
38. Ол заманда Зекерия да (эс джыйыб) Аллахдан: "Эй, Раббим! Меннге бир ашхы бала бер! Ишексиз, Сен тилекни эшитиучюсе", - деб тиледи. (Ол къаратон болгъанды).
39. Сора ол михрабда сюелиб, намаз эте тургъанлай, мёлекле анга таууш этдиле: "Ишексиз, Аллах сеннге Яхия деб (файгъамбар боллукъ) бир джаш береди. Аллахны берген сёзюн керти эте (Бол! Дегенлей болгъанын бегите) келген, халкъны аллында башчы боллугъун, тиширыуладан сакъланнган ашхы файгъамбар да боллугъуну сюйюмчюсюн айтады", -деб.
40. Зекерия да: "Эй, Раббим! Мени сабийим къалай болур, меннге къартлыкъ джетгенди, къатыным да къаратонду", - деди. (Джибрил) да: "Да иш алайды: Аллах не сюйсе, аны этеди", - деди
41. Зекерия да: "Эй, Раббим! Элесе, меннге бир белги эт", - дегенди. "Сени белгинг: юч кюн тилинг сёлешмей, къуру белгиле бла (ышара бла) сёлеширсе. Эртден, ингир да Аллахынга махтаула эте, Аны кёб эсгере тур", - деди.
42. Дагъыда сен эсинге тюшюр, мёлекле: "Эй, Мариям! Ишексиз, Аллах сени сыйлылыкъда сайлады, ийманда да таза этди, тиширыуланы араларында, дунияны юсюнде сени айырма этди.
43. Эй, Мариям, Раббинге бойсун, Анга саджде да эт, рукугъа ийилиучюле бла бирге ийил", - дегенлерин.
44. (Мухаммад) ма была Биз сеннге ачхан таша хапарладанды. Ала чёб атыб, Мариямгъа ким къарарыны юсюнден даулашхан заманда, сен аланы къатларында болмагъанса.
45. (Мухаммад, эсге ал) мёлекле: "Эй, Мариям, Аллах сени Кеси джанындан бир сёз бла къууандырады: (тууарыкъ джаш бла) аты да - Масих Гъыйса, Мариямны джашы - дунияда да, ахыратда да белгили, Аллахха да джууукъ болгъанладан.
46. Ол бешикде да, уллулукъда да адамла бла сёлешир, ашхыладан да болур", - дедиле.
47. Ол да: "Эй, Раббим! Мени къатыма эркиши келмегенди, сора мени сабийим къалай болур?" - деди. (Мёлек да) айтды: "Аллахны буйругъу алайды. Ол сюйгенича джаратады. Ол бир ишни этерге мурат этсе, анга къуру: "Бол!" - дейди, ол да болады,
48. аны уа Ол (Аллах) джазыугъа, акъылманлыкъгъа, Тауратха, Инджилге да юретир,
49. аны Бану Исраиллеге келечи да этер, ол да алагъа: "Мен Раббигизден сизге ачыкъ аятла бла келгенме. Мен балчыкъдан къанатлылача ишлеб, анга юфгюрсем, Аллахны буйругъу бла, ол къанатлы болуб учар. Аллахны буйругъу бла сокъурну да, келепенни да сау этерме, ёлгенни да тирилтирме. Сиз юйлеригизде не ашагъаныгъызны да, анда не азыгъыгъыз болгъанын да айтырма", - дегенди. Ишексиз, ма ол затлада, сизге ойлашыргъа, сейирлик барды. Сиз, ишексиз, муъминле болсагъыз.
50. Дагъыда мен сизге меннге дери Тауратда келгенни кертилигин да бегите, харам болуб тургъан затланы бир къауумун да сизге халал эте, Раббигизден аятла да келтиргенме. Аллахдан къоркъугъуз, меннге да бойсунугъуз.
51. Ишексиз, Аллах мени да Иемди, сизни да Иегизди. Ол себебден Анга къуллукъ этигиз, ма буду тюз джол!", - деб.
52. Сора Гъыйса алада иймансызлыкъны сезгенинде: "Сизден Аллах джолунда меннге болушурукъ кимди?"- деди. Хауариле (асхаблары): "Аллах ючюн сеннге болушурукъла бизбиз. Биз Аллахха толу ийнанабыз. Сен (Гъыйса) бизни Аллахха толу берилгенле болгъаныбызгъа шагъат бол.
53. Эй, Раббибиз! Сен тюшюрген затха ийнандыкъ. Расулунгу ызындан да барабыз, бизни шагъатлыкъ этгенле бла джаз", - дедиле.
54. Сора ала (чууутлула) анга хыйлала къурдула. Аллах да алагъа Кесини хыйласын хазырлады. Аллах а хыйла этиучюлеге, аладан эсе уста хыйла эте биледи. (Аллах, Гъыйсагъа ушашдырыб, башханы кердирди).
55. (Эсге ал, Мухаммад) Аллах Гъыйсагъа: "Эй, Гъыйса! Ишексиз, Мен сени тынчайтама (ёрге Кесиме алыб), сени къаршчыладан тазалайма. Бойсунуб, сени ызынгдан баргъанланы уа, Къыямат кюннге дери, кяфырладан баш этеме. Андан сора къайытыб келиригиз а Мени аллымады. Сора ол сиз тартыш болуб тургъан затха Мен сюд этерме", - деди. (анга джау болгъанланы да, аны Аллхха джаш этгенлени да араларында).
56. Ол къаршчылагъа уа дунияда да, ахыратда да къаты азаб берирме. Алагъа бир джерден да болушлукъ болмаз.
57. Алай а ийман келтириб, ашхы къуллукъла да этиб тургъанлагъа, Ол аланы хакъларын толу берир. Аллах а ассыланы эрши кёреди.
58. (Мухаммад) ма бу Биз сеннге окъугъан затла - ала сейир аятла эмда хикмат затла болуб, эсгертиб окъуйбуз.
59. Ишексиз, Аллах джанында Гъыйсаны (джаратылгъаныны) юлгюсю Адам (файгъамбарны) юлгюсю кибикди. Аны Аллах топуракъдан джаратыб, сора анга: "Бол!" - дегенди, ол да болуб къалгъанды.
60. Бу Раббингден келген хакъды, сен анга ишеклик келтириючюледен болма!
61. Аллахдан билим келиб тургъанлай, Гъыйсаны юсюнден сени бла даулашханлагъа, сен: "Келигиз, бизни джашларыбызны да, сизни джашларыгъызны да, бизни тиширыуланы да, сизни тиширыуланы да чакъырайыкъ эм биз кесибиз да къошулайыкъ, сиз да къошулугъуз да, сора: "Алдауукъчулагъа Аллахны налаты болсун", - дейик да, къаргъышайыкъ", - де. (Гъыйсаны Аллах эмда Аллахха джаш этген бир къауум христианлы Мадинагъа келиб, расулгъа дау салгъанды, кеслерини динлерин тюзлеб. Мухаммад Аллах Бирди, Аны джашы, юй бийчеси джокъду дегенине чарлаб. Сора Мухаммад аятда айтылгъан шартны салгъанында, таукел эталмай, ала къоркъуб, кече бла джанлаб кетгендиле).
62. Ишексиз, ма бу хакъ хапарды. Аллахдан ёзге башха бир деб бир аллахлыкъ эталлыкъ джокъду. Ишексиз, Аллахны уа неге да къолундан келеди, Ол акъылманды.
63. Ала хакъгъа арт бурсала уа, Аллах а, ишексиз, бузукъчуланы билибди.
64. Сен алагъа: "Эй, китаб ахлула! Бизни бла сизни арабызда тенг болгъан сёзге келигиз, сиз да, биз да Бир Аллахдан ёзге башха джукъгъа къуллукъ этмезге. Анга джукъну да тенг этмезге. Аллахны къоюб, бир-бирибизни да раббийле (аллахла) этиб тутмазгъа", - де. Ала арт бурсала уа, алагъа: "Сора сиз шагъат болугъуз, бизни Бир Аллахха берилгенле (муслиманла) болгъаныбызгъа", - де.
65. Эй, китаб ахлула! Сиз Ибрахимни хакъында нек даулашасыз, Таурат да, Инджил да андан сора артда тюшгендиле сора? Алайына бир сагъыш эталмаймысыз сиз?
66. Ма сиз а, аны биле да тургъанлай, (аны юсюнден) тохтаусуз даулашыб турасыз. (Аны кибик) билимигиз болмагъан затны юсюнден да, билгенлеча, нек даулашасыз? Аны Аллах биледи, сиз а билмейсиз. (Уллу Аллах Кеси тюзюн айта тургъанлай, ала анга тохташалмай, кеслериникин айтыб, даулашыб тургъандыла).
67. Ибрахим не чууут динде, не христиан динде болмагъанды. Алай а ол Аллахына берилген ханиф болгъанды, ол мушрикледен болмагъанды.
ызына/суураланы тизими/аллына
